Arjuna Awards dawng thei zingah Jeje
All India Football Federation (AIFF) chuan India rama infiammite chawimawina sang Arjuna Awards dawng turin Ministry of Youth Affairs and Sports-ah hming pathum a thehlut a, hming thehluh zingah Mizo tlangval Jeje Lalpekhlua a tel.
Indian FA-in footballer hming pathum a thehluhah hian Jeje bakah Manipur hmeichhe footballer lar Oinam Bembem Devi leh Stabaek goalkeeper Gurpreet Sandhu te hming pawh a tel a ni.
Hnahthial tlangval Jeje hian nikum chhung khan India ram football-a mimal chawimawina dawn theih ang zawng zawng chu a dawng vek a, FPAI Indian Player of the Year-a thlan a nih bakah AIFF Player of the year a ni bawk. Nikum khan Jeje hian Federation Cup season khata goal khung hnem ber leh khawmualpui huap inelnaa Indian player zinga season khata goal khung hnem ber record a siam bawk.
Kum 36-a upa Bembem-i hi Indian football-a legend huang chhungah hial dah a ni a, India hmeichhe team tan match 85-a inlanah goal 32 khungin 2016 South Asian Games-a gold a lakpui hnuah inkhelh a chawlhsan.
India chhuanvawr goalkeeper Gurpreet Singh Sandhu hian Norwegian club Stabaek FC tan a khel mek a, June 30, 2016-a Welsh club Connah's Quay nen an inhmachhawn ṭuma goal vengin Indian player zinga Europa League-a inlan hmasa ber dinhmun a luah.
Arjuna Awards hi Indian footballer 24-in an dawng tawh a, Mizote hriat lar zingah Baichung Bhutia, IM Vijayan leh Sunil Chhetri an tel a, Chhetri-a'n kum 2011-a a dawn hnuah nikum khan footballer hming lang ve leh chauhin goalkeeper Subrata Paul chuan a dawng a ni.