Olympic a tel turin Mizo an ṭha tawk - IOA joint secy

Indian Olympic Asso­ciation-a associate joint secretary Mukesh Kumar chuan khawvel huap infiamnaa inelna ngaih­hlut hlawh ber Olympic-a tel turin Mizo an ṭhat tawk thu Vanglaini a hrilh.

Judo Federation of India (JFI) president ni bawk Mukesh Kumar hian nimin khan Mizoram Judo Hall, Zemabawk North-a JFI Training Centre hawnna a nei a, he centre hi India rama Judo training centre 12-na a ni.

Mukesh Kumar chuan, "Ka sawi fo ṭhin chu Mizote hi infiamna engah pawh Olympic-a inlan turin an ṭha tawk tih hi a ni a, a bik takin Judo-ah India ai an awh theih hi ka ring tlat a, Mizo hmeichhiaah beiseina ka nei sang lehzual a ni," tiin Vanglaini a hrilh a, lightweight leh heavy­weight-ah beiseina a san thu a sawi bawk.

Judo Union of Asia-a president ni bawk Mu­kesh chuan Mizo ten an tlakchham ṭhin chu tih tak takna a nih thu sawiin, "Mizote hian talent an nei tih ka chiang a, a pawi ber erawh kum hnih thum bak an ti peih tak tak ṭhin lo hi a ni. Hei aia tih takzetna nen Judo hi luhchilh se ka duh a, keini chuan kan tih theih tiin infrastructure ṭha zawk kan rawn chhawp tawh. Mizo Judo player-te hnen aṭang hian beisei ka nei let ve a ni," a ti a, tih takzetna nena Mizoin an khelh phawt chuan national mai ni lo international thlenga medal beisei ngam tur an nih thu Vanglaini a hrilh.

Mukesh Kumar hian JFI training centre hawnna inkhawmah Mizoram-ah player-te training pe tura coach an tirh tur thu a sawi a, Vanglaini palaiin an tirh hun tur a zawhna chu chhangin, "Coach tirh tur hi inbiakna neihpui mek a ni tawh a, Assam-ah training centre kan hawn zawh ve chiah bawk avangin inṭhenawm state-a training camp a buatsaih zawh veleh Aizawlah a rawn kal ang," a ti a, a thutiama a din ngheh tur thu a sawi.

Mizoram Judo Hall, Zemabawk North-a JFI Training Centre hawnna inkhawmah hian TNT naupang, cheraw lam hmanga Mukesh Kumar lo lawmtute chu JFI president hian nakkuma Judo Commonwealth Games, Jaipur khawpuia neih tura tel tura sawmin a senso zawng zawng a tum tur thu a sawi a, he thu hi Mizoram Judo Association treasurer Dr. Lalrokima Chenkual chuan a puang a ni.