MSL1 final rematch Zarkawt BCA Vs Khatla TBL
Mizoram Super League Season 3 semifinal hmasa zawk game 1 chu zanin dar 8:00 hian Zarkawt BCA leh Khatla TBL ten an khel dawn a, Hawla Indoor Stadium khatin mipui an punkhawm ngei beisei a ni.
MSL Board-in a tarlan tawh angin semifinal aṭangin inkhel en man hi Rs 150 leh Rs 50 a ni dawn a, league round aia en man a san ang chiahin inkhel pawh a hmuhnawm sawt ang.
100% chak
Zarkawt BCA-in MSL hmasa berah final-ah Khatla TBL an hneh lo a, season liam ta khan semifinal an thleng pha lo. Tun season-ah erawh group match-ah an khingpuite an hneh vek a, champion tura rinkai an ni.
Amaherawhchu, BCA hian buaina lian tak an nei a, knockout stage-ah hian India camp zawm vangin Amritpal leh Yadwinder Singh te an chhawr thei tawh dawn lo. State pawn player ṭha pahnih tel hian BCA-in league round-ah Khatla TBL chu 67-51 in an sawp a, semifinal-ah erawh Mizo hlangin an khelh a ṭul dawn.
Mizo hlangin BCA hian Palpreet Singh Brar leh Amjyot Singh te telna Tuikual South bakah Zarkawt Serpents an hneh tawh a, an tawnhriat hian fiahna hautak zawk hmachhawnna kawngah a pui ngei ang.
BCA coach Lalruatfela chuan, "Champion kan duh a, chumi ti thei tur chuan Khatla TBL hi kan hneh ngei ngei a ṭul a ni. Hnehna chang thei turin kan inbuatsaihna a ṭha a, tuna kan mamawh chu supporter a ni. TBL nen kan inkhelh hunah BCA supporter-te a hmun ngeia en turin ka ngen," tiin mipui pawimawhna a hrechiang hle.
Beisei pha lo
Khatla TBL hi inelna vawi hnih awm tawh a champion ve ve ni mah se tunah season-ah Vishesh Bhriguvanshi, Garry Gill leh Chris Solomon te an nei chung pawhin champion zia an pho chhuak thei rih lo.
An vanduaina belhchhah turin Garry a inhliam a, India camp zawm vangin Vishesh Bhriguvanshi a inlan theih dawn lo. Chhawr theih tur ber American player Solo lah Tuikual South nen an inkhelh ṭumin Palpreet nen an insual vangin match thum khel thei lo tura hrem a ni.
TBL manager Lalawmpuia Pachuau chuan, "Semifinal hi Mizo hlangin kan khelh a ṭul dawn a, hei vang tak hian chak tur pawhin kan bei nasat lehzual a ṭul dawn a ni. Hnehna kan chan ngei kan tum a, chumi tur chuan ka naute ka ringtawk a ni," tiin Vanglaini a hrilh.
In el tawk
Infiamnaah chuan an inel tawk lo inhmachhawn a hmuhnawm thei lo a, Khalta TBL hian an intum hmasak ṭumin Amritpal leh Yadwinder te telna BCA an ngam lo.
Tun ṭumah erawh state pawn player tel loa khel tur an nih avangin chak zawk tur rin thiam a har a, Mizoram chhung basketball inelna sang bera Mizo club-te Mizo player hmanga an inel tur hi tualchhung basketball ngaina chin tan chuan a hlu zawk ang a, a hmuhnawm zawk bawk ang.
Semifinal - 8:00 PM
Zarkawt BCA Vs Khatla TBL
Game 1 May 4, Ningani
Game 2 May 9, Thawhlehni
Game 3 May 11, Ningani
Mission Veng Vikings Vs Tuikual South
Game 1 May 5, Zirtawpni
Game 2 May 10, Nilaini
Game 3 May 12, Zirtawpni
Final - 9:00
Game 1 May 16, Thawhlehni
Game 2 May 18, Ningani
Game 3 May 19, Zirtawpni