I League coach ṭha ber Khalid
Beisei loh taka Aizawl FC a champion pui hnuah chawimawinain Khalid Jamil a um zui zel a, kum 40-a upa coach hi I League khelh zawh taka coach ṭha berah thlan niin Syed Abdul Rahim Best Coach Award pek a ni.
Aizawl FC-in champion nomawi an chawina kawnga player thawhhlawk tak Alfred Kemah Jaryan chu best midfielder-ah thlan a ni a, rin loh takin Mizo club players dang zingah lang phak an awm lo.
I League champion AFC-in Mizo player thawh lo mah se Mizo hming hmuh tur erawh a awm tho a, Indian Super League-a Emerging Player of the league dinhmun lo luah tawhtu DSK Shivajians defender Jerry Lalrinzuala chu Best Emerging Player of Hero I League-ah thlan a ni.
Mohun Bagan-in pahnihna nichungin season khar mah se players pahnih an thawh a, Aizawl FC nen an inumna kawnga match riat chhung goal chhuah loa awm thei Debjit Majumder chuan Best Goalkeeper Award dawngin Bagan tana bang rinawm Anas Edathodika chu best defender-ah thlan a ni bawk.
Best Striker award chu rinlawk ang ngeiin Shillong Lajong striker Aser Pierrick Dipanda Dicka hnenah pek a ni a, Valencia B striker hlui hian Meghalaya club tan goal 11 ngawt a khung.
Churchill Brothers FC chu Fairplay Award pek an ni a, match commissioner-ten point an pek dan aṭanga chhutin ‘Best Organiser Award’ chu DSK Shivajians leh Bengaluru FC hnenah pek a ni.
I League Awards-a ngaihhlut hlawh ber ‘Hero of the League’ award erawh rin loh takin Bengaluru captain Sunil Chhetri hnenah pek a ni a, India striker chhuanvawr hian he chawimawina dawng tur hian ‘The Steelmen’ tan goal sarih a khung.
India rama club inelna sang ber I League Awards dawng tur hi inelnaa inlan club 10-a coach leh captain ṭheuhin an thlang a ni.
I League Awards 2016-17
Best Coach Khalid Jamil, Aizawl FC
Hero of the League Sunil Chhetri, Bengaluru FC
Best Goalkeeper Debjit Majumder, Mohun Bagan
Best Defender Anas Edathodika, Mohun Bagan
Best Midfielder Alfred Kemah Jaryan, Aizawl FC
Best Striker Aser Pierrick Dicka, Shillong Lajong
Emerging Player of I League Jerry Lalrinzuala, DSK Shivajians
Fair Play Awards Churchill Brothers
Best Organiser DSK & Bengaluru