Cruyff tluktu Robben a hlim

Bayern Munch-in Bundesliga nomawi an chawi chiah khan Arjen Robben tan league title 10-na a ni a, Dutch legend Johan Cruyff nen league nomawi an chawi zat a in ang chiah.

Robben hi Europe a league lian paliah a champion tawh, Bundesliga title paruk a lak tawh bakah Chelsea tan Premier League, Real Madrid-a a khelh laiin La Liga leh PSV tan Dutch Eredivisie nomawi a chawi tawh a ni.

Cruyff khan Ajax tan league nomawi pariat a chawi bakah Feyenoord chu an ram league-ah hian a champion pui bawk a, Barcelona tan Spain champion a ni bawk.

Kum 33-a upa Robben chuan, “Holland tana footballer ropui ber nena league nomawi kan chawi zat a intluk mai hi mak ka ti a, ani nena khaikhin tur ni lo mah ila hetiang dinhmun ka luah ve thei hi ka lawm­in ka hlim takzet,” tiin a sawi.

Season hmasa khan Pep Guardiola kaihhruaina hnuaiah Robben hian Allianz Arena-ah hmun pawimawh a chang phak meuh lo, tun season-ah erawh Carlo Ancelotti hnuaiah mi pawimawh niin inelna hrang hrangah match 35 a khelh aṭangin goal 14 a khung tawh a ni.