Real Ronaldooo

Cristiano Ronaldo hattrick hmangin Real Madrid chuan an mikhual Atletico Madrid 3-0 in an sawp. Zinedine Zidane-a naute hi Champions League nomawi humhim thei hmasa ber ni turin an dinhmun a ṭha zel, tun hnai kum li chhunga a vawi thum nana final khel turin an ke ding lamin Cardiff a rap tawh.

Thawhlehni zan Champions League semifinal first leg inkhelah Ronaldo hian minute 10’, 73’ leh 86-naah te goal a khung a, he inelna bikah hian goal khung hnem ber niin goal 103 zet a nei ta. April 23 zan El Clasico khelh ṭuma Lionel Messi goal vanga Madrid fans ṭahna Santiago Bernabeu chu Ronaldo vangin hlimna awrawlin a thangchhuak leh ta.

Real nge nge...

European Cup tih a nih lai khan club 37-in nomawi an chawi a, heng zinga 13 chu a kum zawnin an champion thei. Kum 1992 aṭang khan Champions League tia thlak a nih hnuah team 24 an champion leh tawh a, champion zawn an la awm ngai lo thung.

Season hmasa khan Zidane-a’n a kaihhruai aṭanga thla ruk hnu lekah Real Madrid hian Atletico hnehin Champions League nomawi an chawi. Kuminah France manager hian kum 2012 hnua a vawi khat nan La Liga nomawi chawi an beisei mek a, UCL champion zawn thei dinhmunah an ding mek bawk.

Diego Simeone nauten beiseina sang tak nen Real Madrid khelmual pan mah se an in hmachhawn hnuhnung match 27 aṭanga goal 18 khung thei Ronaldo bawk hi tun ṭuma an ven hneh loh leh chu a ni.

Sergio Ramos ball cross-ah Ronaldo chu offside ngeiin a lang, mahse ball hian Ronaldo a thleng lo. Midfielder Casemiro ball pet a tauh luhna kawngah erawh Portugal fachuam awmna hmun hi sawisel theih a ni tawh lo ang.

Striker Karim Benzema-a’n Atletico defender Diego Godin a paltlang hnuah Filipe Luis-a ball dan per chu Ronaldo hian laklawh nei miah loin yard 16-a hla aṭangin a hlap lut. Hun tawp dawna an goal thumna khung kawngah erawh Lucas Vazquez hnathawh sawi hmaih a thiang lo.

Tun season kal laia goal chhuah tlem ber Atletico Madrid (25 goals) lakah Real goal nawr a na em em a, minute 90 chhungin goal khung tumin vawi 17 zet an pet, heng zinga pasarih chu target zawnah a kal; an mahni goal zawnah ṭum khat chiah ball a kal thung. Real hian an mikhual lakah inkhel an thunun a, dinhmun hlauhthawnawma ding miah loin hnehna an chang.

Real Ronaldo

Portugal forward Ronaldo hi kum 32-a upa a ni tawh a, Euro 2016-ah an ram a champion pui vang leh final-a hliam a neih avangin Real Madrid player dang aiin season bul a ṭan tlai bik. Khelmual chhunga a inlan ṭum pawhin tun hma lama ‘Ronaldo’ kha a phak loa ngaih a ni.

Tun season-ah Ronaldo hian La Liga match 26 a khelh aṭangin goal 20 a khung a, Champions League quarterfinal hmalam khan goal hnih bak a khung lo bawk - a zawnin match ruk chhung goal a khung lo a ni! Player dang chetdan nise sawisel tur niin a lang lo, mah se Ronaldo hi a vanglai a pel ta tia sawitu leh amah seltu an tam hle.

Amaherawhchu, player thiam bik leh theihna sang bik nei hi thup hlen theih a ni lo. Quarterfinal-a Bayern Munich an hmachhawn ṭumin Allianz Arena-ah goal hnih khungin German fans a ngawihtir a, Bernabeu-ah hattrick siamin Madrid fans a au tir zui bawk. Tunah chuan Champions League knock out stage bika goal 50 khung tling (52 goals) thei hmasa ber a ni leh ta.

Real manager Zidane chuan, “Ka naute an khel ṭha vek. A bikin Cristiano hi chu goal khung tura piang a ni. Player ropui tak takte nen kan thawkho thei hi ka lawm a, eng team pawh hneh thei turin kan ṭha tawk a ni,” tiin a sawi.

Atletico an vanduai

Madrid khawpui club zingah Real an len fal em avangin Atletico tan nomawi chawi turin kawng a awm loa ngaih a ni ṭhin. Kum 2011 aṭanga Diego Simeone-a’n a enkawl aṭang erawh chuan ngaihdan hmasa hi zawi zawia thlakthleng a ni.

Argentine manager kaihhruaina hnuaiah Atletico hian kum 2013 khan La Liga nomawi an chawi a, kum 2014 leh 2016 khan Champions League final-ah Real an hneh lo; 2015 quarterfinal-a an hneh loh pawh Real tho an ni.

Atletico hian tun hnai UCL inkhel pawimawh pathuma an ngam loh lakah insiamṭhat tum mah se beisei an phak lo. Inkhelh chhung zawngin ball possession 38% chiah an chang a, inkhelh chawhma lamah khan an pass 21.5% zet an ti dik lo bawk.

May 10, Nilaini zanah second leg khelh a ni leh dawn a, kum 1967 aṭanga an hman tawh Vicente Calderon-a Champions League match an khelh hnuhnung ber tur a ni. Season thara stadium thar nei tur Atletico hian hnehna chan an duh a nih chuan kawng tinrenga hmasawn an mamawh ang.

Atletico Madrid manager Simeone chuan, “He inkhel hi chu kan theihnghilh tur a ni. Football-ah chuan thil thleng thei ngai lo tura ngaih ang hi a thleng fo. Beiseina zawng zawng a ral raih hma chuan kan theihna zawng zawngin kan bei let ang,” a ti. Manager rorum leh huaisen a la beidawn loh avangin second leg a hmuhnawm zual ang.