Celta Vigo hmaah hliam vanga buai United
Europa League semifinal chu zanin hian khelh a ni dawn. Estadio de Balaidos-ah Celta Vigo-in zanin dar 12:35 hian Manchester United an mikhual ang a, Ajax-in an mual Amsterdam Arena-ah zanin dar 10:15 hian Lyon an hmachhawn ve bawk ang.
Spain rama inkhel hi Ten 2-ah a en theih ang a, semifinal hmasa zawk hi Ten 1-ah pekchhuah an ni bawk dawn a ni.
Damdawi in
Manchester United-in league match hnuhnung bera Swansea nen an inhnehtawk ṭumin hliam vangin Luke Shaw leh Eric Bailly te lakchhuah an ni a, anni bakah Marcos Rojo, Chris Smalling, Timothy Fosu-Mensah leh Zlatan Ibrahimovic ten hliam vang thoin Celta Vigo an hmachhawn thei lo ang.
Jose Mourinho tana thu lawmawm chu beisei aia hmain Juan Mata a dam a, Spanish midfielder hi Welsh club nena an inhmachhawn ṭumin bench-ah a ṭhu tawh.
Belgian midfielder Marouane Fellaini chu derby match-a Manchester City nena an inkhelh ṭumin hnawhchhuah ni mah se Europa-ah chuan chhawr theih niin khawvel player manto ber Paul Pogba pawh hliam vanga match hnih a khelh theih loh hnuin a dam ṭha leh tawh bawk.
Tlarhnung phuahchawp
United inhliam zinga panga hi defender an ni a, defensive game khel thiam Mourinho-a'n a player neih angte a hman thiam a ṭul dawn a ni.
Portuguese manager Mourinho chuan, "Phil leh Chris te hi an dam hman ka ring lo. Tupawh thlang ila, ka thlan hi chuan a theihna zawng zawngin a khel ang. Hman theih turin Matteo Darmian, Michael Carrick emaw Axel Tuanzebe te chhawr theih turin an awm a, ka naute hi ka ringtawk vek a ni," tiin tlarhnungah Daley Blind-a kawppui tur a la thlan fel loh thu a sawi.
Hriatthiam har Celta
United tlarhnung phuahchawp tan Celta Vigo tlarhma dan an harsat a rinawm a, Spanish club hian target man atan City forward hlui John Guidetti an hmang.
Kum 25-a upa Guidetti chuan, "Thil thleng thei lo a awm lo. An sawi ṭhin angin Manchester hi a pawl a, Celta pawh kan pawl. Manchester kan tlawh hunah pawh tih pawl zel kan tum ang," tiin chak a inbeisei thu a sawi.
Celta winger Iago Aspas-a'n tun season-ah vawi 44 a inlan aṭangin goal 24 a khung tawh a, Liverpool player hlui hi United tlarhnung tan ven uluk a ṭul ang.
Spanish club hian Europa League-ah semifinal hial thlen theih nan hian La Liga lam an ngaih thah a, league match hnuhnung pathumah chak lo vekin table-ah 11-na an ni. Celta hian kartawp khan Athletic Bilbao 0-3 in an hneh lo a, United an hmachhawn dawn vangin player ṭhahnem tak chawlh hahdamtir an ni.
Club lian lakah buai lo
Celta Vigo hian club lian lakah record an nei ṭha. Galicians hi Luis Enrique huna Nou Camp-a vawi thum chak thei an ni a, an mualah Catalan hi vawi hnih an hneh bawk.
Tun season-ah Champions League final lut mai tura ngaih Real Madrid chu Celta hian Copa del Rey aṭangin an pet chhuak. Season liam ta khan Spanish Cup-ah Atletico Madrid an hneh bawk a, Vicente Calderon-a Diego Simeone naute laka goal thum khung thei pahnihna chauh an ni. An record thlirin United tan club zuam awm an ni lo.
United ve thung
Manchester United hian league match hnuhnung 25-ah chak loh an tawng tawh lo a, season khata hneh loh nei loa kal tluan rei ber ni mah se an mualah vawi 10 lai draw vangin inchhuang thei an ni lo. An stadium chhuan em em Old Trafford pawh 'Theatre of Dreams' ti hialin hminglem pe mah se 'Theatre of Draws' tihin an sawi fiam sak tawh.
United tana thu lawmawm erawh Henrikh Mkhitaryan-a'n Europa League match hnuhnung palia Zorya Luhansk, Saint-Etienne, Rostov leh Anderlecht an hmachhawn ṭumin goal a khung vek. Armenian midfielder hian zanina goal a khung leh a nih chuan United player zinga Europe-a a zawna goal nga khung hmasa ber a ni ang.
Jose Mourinho hote hian season thara Champions League khelh an tum avangin Europa League champion an tum ruh hle. Portuguese manager chuan, "Celta kan hneh chuan final kan khel dawn a, chhut thiam a ngai dawn hle. Europa League final hi Nilainiah khelh a ni dawn a, hemi hma Pathianni hian Crystal Palace kan khel dawn a, chumi hma chuan Southampton kan hmachhawn leh bawk ang. Final-ah hian kan chau viau thei a, chuvangin Nicky Butt naute (Reserve team) kan khelhtir a ṭul hial ang. Amaherawhchu Palace-in point an la mamawh si a, hetiang thutlukna kan siam a ngaih chuan a dik lo ang," tiin champion an tum thu a sawi.