Court-ah Kvitova a lo kir

Wimbledon champion vawi hnih ni tawh Petra Kvitova chu hun rei tak hliam vanga a inkhelh theih loh hnuah Thawhlehni khan court chhungah a lo kir leh ta.

Nikum November thla khan Czech nula hi a chenna inah chemte hmanga beih a ni a, a ban veilamah hliam tuarin zai a ni, tun season-ah tournament a la khel thei lo.

World number 15 Kvitova chuan, "Court chhungah ngei mai ka inkhel leh thei ta hi ka lawm hle a, tennis ngainatu midang pawh an lawm ve ngei ka ring," tiin a sawi.

Kum 27-a upa Kvitova hi a tirah chuan thla ruk chhung chawl tura ngaih a ni a, mah se kar hmasa lawk khan May 28 aṭanga khelh tur French Open-ah a inlan theih a beisei thu a sawi. Tuna hian clay court-a khelh tur Grand Slam atan hian hming a pe lut tawh.