Infiamna tana mi ṭangkai Francis Paul a thi

Nimin zing dar 5:00 khan Francis Paul chu lungphuchawl avangin a thi a, kum 42 mi a ni. 'Gerrard-a Pa' tia hriat lar Francis Paul hian kum 2008 khan Mizoram Sub-Junior (U-16) team chu a manager-na hnuaiah 31st National Football Championships for Mir Iqbal Hussain Trophy-ah a champion pui.

Mizoram Football Association chuan kum 2013 May thlaah FIFA, AFC leh AIFF te nena thawk hoin Grassroots Football a kalpui ṭan a, Francis Paul hi Trainer hmasa berte zingah telin, Grassroots Development Officer hmasa ber atan ruat a ni. A kaihhruaina hnuaiah kum 2014-15 khan Mizoram Football Association chu AIFF-in Best Grassroots Development Programme chawimawina a hlan. MFA-ah hun rei tak chhung Executive Committee member a ni a, Youth Development lamah a thawh hlawk em em a; Aizawl-a football tournament lian tak takah vawi duai lo TV commentary hna a thawk ṭhin bawk.

Amah hi sports journalist a ni a, Doordharshan-a infiamna chanchinthar buatsaihtu niin football bakah infiamna dangte chanchinthar thehdarh kawngah theihtawp chhuahin a thawk ṭhin.Mizoram State Sports Council-ah a zawnin term thum: 2011-2014, 2014-2017 leh 2017-2020-ah te member a ni. Football chauh ni loin cricket, tennis, basketball, badminton leh athletics-ah te a tui a; nimina Zuangtuia vuina hunah pawh hian sports association hrang hranga hruaitute an kal ṭha hle.