Kum dang aiin kan bike a ṭha - Rossi

Valentino Rossi chuan kum dang zawng aiin tun season-a Yamaha bike chu a ṭha zawka a hriat thu a sawi a, an team chu world champion an nih theih ngei a beisei thu a sawi tel bawk.

Kum 38-a upa Rossi chuan, "Nipui chawlh lai khan hma kan sawn theih dan tur chi hrang hrang kan ngaihtuah nasa em em a, a chhanna dik kan hmu niin ka hria. Intlansiak kan neih tawh aṭanga ka chhutin season dang aiin kan bike a chak zawk a, champion turin beiseina pawh kan nei sang hle," tiin a sawi.

Tun season-ah MotoGP intlansiak pathum a awm tawh a, Yamaha rider Rossi hian point 56 hmuin rider championship hmahruaitu a ni. A teammate Maverick Vinales (50 points) chu pahnihna niin an hnungah hian Marc Marquez (38) a awm bawk.

Italian rider Rossi chuan Vinales chungchang sawiin, "Kumin aṭangin Yamaha bike a khalh chauh a ni a, mahse a mikhual lo. Texas-ah khan vanduai hlauh lo se la chuan hmahruaitu ni thei a ni a, a lakah beiseina kan nei sang hle," a ti.

Kumin MotoGP-ah hian in­tlansiak 18 neih tur a ni a, heng zinga pathum chu an tlan tawh. Pathianni tlai hian round 4 atan Spanish Grand Prix an tlan leh ang.