Utah Jazz lakah Golden State chungnung
Nimin zing NBA playoff, western conference semifinal Game 1-ah Golden State Warriors chuan Stephen Curry point 22 score hmangin Utah Jazz 106-94 in an hneh.
Oracle Arena, Oakland-a inkhelah Curry bakah Kevin Durant chu player langsar leh pawimawh a ni. American star Durant hian point 17 a score bakah rebound leh assists vawi nga a nei bawk.
Warriors leh Utah te hi regular season-ah khan team hmuhnawm berte zinga mi an ni a, playoff-ah pawh an inchhaih tawk hle. Quarter hmasa berah Golden State hian point rukin an hmu hnem zawk a, quarter hnihnaah Ian Clark, Klay Thompson, Andre Iguodala, Draymond Green leh David West ten bul ṭanin Warriors chu 12-4 in hma an hruai fal pui a, a tawp thlengin an chungnung zui ta a ni.
Season hmasa khan Golden State hi western conference champion an ni a, kuminah pawh regular season table-ah hmahruaitu ni lehin playoff-ah pawh chak loh an la nei lo. Zirtawpni zing dar 8:00-ah Game 2 an khel leh ang.
Nimin zing inkhel pakhat zawkah Boston Celtics chuan Washington Wizards 129-119 in an hneh ve bawk. Celtics tan hian guard Isaiah Thomas chuan playoff a khelh tawh china point a score hnem ber ṭum a tawng. Thomas hian point 53 zet a score a, heng zinga point 29 chu quarter hnuhnung bera a score a ni.
Boston Celtics hian Game 1-ah 111-123 in hnehna an lo chan tawh bawk avangin series-ah 2-1 in hma an hruai a, Zirtawpni zing dar 5:30-ah Game 3 an khel leh ang.