Sharapova chungchangah Murray ṭawng chhuak

World number 1 Andy Murray chuan hmeichhe tennis star Maria Sharapova chuan Wimbledon khel turin a dinhmun a siamṭhat hman a beisei thu a sawi chhuak.

Thla 15 hrem a nih hnuah Sharapova hi kar hmasa khan Stuttgart Open-ah a rawn kir a, semifinal-ah a chak lo. Final a luh loh avang hian world ranking-ah 262-na bak a la luah thei rih lo.

Grand Slam bikah qualifier khel tur pawhin world number 200 chin tal nih a ngai a, wildcard pek a nih loh chuan vawi hnih a champion tawhna Roland Garros-ah a hmel kan hmu dawn lo. French tennis federation chuan May 16 hian wildcard an pek dawn leh dawn loh an tichiang ang.

Kum 29-a upa Murray chuan, "Ka thuneihna leh remruat tur a ni lo nachungin Maria hian Wimbledon khel turin hun ṭha a neih theih ka ring. Hun rei tak a inkhelh loh hnuah a rawn kir leh hlim chauh a ni, chutih rualin reilote chhungin inelna lian hmachhawn turin a ṭhatawk leh hman ang," a ti.

Grand Slam vawi thum champion tawh Murray hi a dar na vangin tun season-ah beisei angin a la khel chhuak lo. Tunkara khelh tur Madrid Open-ah a inlan dawn a, French Open inbuatsaih nan Italian Open-a khel zui leh bawk ang.