Huaisen takin Djokovic a chak

Set hmasa pahnih a hloh a, a service ṭha tak ni ṭhin pawh a him lo. Chak lo mai tur nia a lan hnuah Novak Djokovic chu huaisen takin a tho chhuak a, inkhel boruak sangah hnehna changin Wimbledon semifinal a lut.

Thawhlehni zan quarterfinal inkhel a hmuhnawm, seeded pakhatna Djokovic hian Jannik Sinner chu 5-7, 2-6, 6-3, 6-2, 6-2 in a hneh hram. Semifinal-ah chuan tualchhung tlangval Cameron Norrie nen an inhmachhawn leh ang.

Quarterfinal inkhel dangah Norrie chuan David Goffin 3-6, 7-5, 2-6, 6-3, 7-5 in a lo hneh ve thung, tualchhung mi a nih avangin fans a nei ṭha. Zanina Djokovic nen an inkhelh hunah pawh ṭan a hlawh dawn, inkhel boruak nung tak kan hmuh ngei a rinawm.

Thawhlehna
Centre Court-ah Djokovic-a'n bul a ṭan fuh a, set hmasa berah 4-1 in a sang fal nghal; a lan dan mai chuan harsa vak loa set la tur niin a ngaih theih. Mahse, rin ang ngawt chu a ni bik lo, seeded 10-na Sinner a rawn ding chhuak a, set a la let zawk ta daih.

Set hnihnaah pawh Italian tlangval bawk a che fuh, hemi set bikah phei chuan game hnih chiah a hloh. Service a neih ṭhat avangin champion lai hneh turin a dinhmun a ṭha takzet a, amaherawhchu inkhel a la zo tlat lo.

Serbian star Djokovic-a'n inthiar chawlh (toilet break) a la, hetah hian darthlalang hmaah inenin amah leh amah a infuih. A chesual leh zauh a nih chuan a zinkawng a tawp dawn tih a hria, a theihna zawng zawng sawm khawmin set thumna a khel.

Thil engkim a danglam ta, boruak sangah tawnhriat nei ṭha Novak a dingchang zel a, darkar thum leh minute 35 an inkhelh zawh meuh chuan Djokovic a chak let ta daih. Thiam leh theihna mai bakah rilru puthmang dik leh huaisen a pawimawhna kan hmu.

Hmabak Norrie
Kum 35 mi Djokovic tan chuan Sinner hi a kawnga player hautak ber a la ni hial a, tun hma lama a sulhnu leh player dang chet tawh dan chhut chuan semifinal-a a hmachhawn tur Cameron Norrie hi nem zawk tura ngaih a ni hial.

Wimbledon champion lai Djokovic chuan, "Set hmasa pahnihah kha chuan kei aiin a ṭha zawk. Darthlalang hmaah ka ding a, keimah leh keimah ka infuih. A chang chuan kan chet fuh theih loh lai hian rilru tih danglam a ngai ve ṭhin," tiin a sawi.

Semifinal thlir zui nghalin Serbian tlangval chuan, "Tunge ka hmachhawn dawn tih hi a pawimawh ber lo, semifinal lut phak a nih chuan player ṭha tak a ni tihna a ni mai. Quarterfinal-ah pawh mualpho thei dinhmunah ka ding hman, chuvangin fimkhur a ngai takzet," a ti.

Andy Murray hnu lamah British miten an ram player ṭan tur an duh a, an duh ang tak an hmu thei lo. Tun season atan chuan Norrie hi an ṭan rawn bur a ni ber mai, zaninah pawh fans puihna hmangin thil mak thlen nawn tir leh an tum ngei ang.