Arsenal mikhual tur chu CHAMPION

Zanin dar 12:45 hian Arsenal chuan Emirates Stadium-ah Premier League an khel dawn a, an mikhual tur chu champion Liverpool a ni - team pahnih boruak hip a inthlau rih hle a, khelmual chhungah erawh chak zawk nih an tum ngam ve ve ang.

Reds hian season kal laiah league match bak khelh tur an nei tawh lo, point hmu hnem record siam an tum avangin Gunners laka hnehna chan a ngai. Mikel Arteta naute pawhin European football beiseina chhi nung hram turin chak an mamawh ve bawk.

Jurgen Klopp-a enkawl Liverpool an kal fawr a, an khelmual Anfield bika league match an khelhah chak vek an tum. Mahse, team vantlang Burnley nen 1-1 a an inhnehtawk avangin an record siam tum hi a tlawlh. Point hmu hnem record erawh an la siam thei. Pep Guardiola enkawl Manchester City chuan 2017-18 season khan point 100 an hmu a, tun dinhmunah Reds-in point 93 an nei tawh, khelh hmabak pathum an la nei.

North London derby a chak lo hlim Arsenal tan fiahna hautak a ni dawn. Arteta naute hi an chak lo a nih chuan European football khelh beiseina a thamrala ngaih theih a ni ang. Gunners dinhmun a ṭha lo, Spurs hneh loh rilru na thawi dam nan Liverpool hneh an tum dawn.

Jordan Henderson chu hliam vangin tun season chhungin a inlan thei tawh dawn lo. Liverpool captain hi inkhel thei dawn tawh lo mah se manager Klopp chuan an ruahman lawk angin Hendo-a'n nomawi a chawi tur thu a sawi chiang.

Liverpool manager-in nomawi chawi dan tur a sawi thei tawh a, defender Andy Robertson pawhin Emirates Stadium-ah champion zia an chhuah tur thu a sawi - tunlai Arsenal boruak leh an mikhual tur boruak hip chu khaikhin chi a ni rih lo.

Robertson chuan, "European football khelh la beisei lai nen kan inkhel dawn, match huatak kan khelh hnu lawkah a hautak dang kan khel leh dawn. Hnehna changtu nih kan tum ve ve dawn a, hamrik hnuhnung a rik hunah point thum hmu zawk kan nih ka beisei. "Match khelh hmabak pathum kan la neih hi a pawimawh em em vek, heng aṭang hian point hmuh theih sang ber kan hlawhchhuah ka beisei," a ti. Liverpool hian league nomawi chawi an duhtawk lo a, point hmu hnem record siam ngei an duh; tha an thlah lo ang.

Mikel Arteta naute hian point an hmuh theihna tur anga ngaihah an hloh fo a, goal nei hmasa ve ṭhin mah se an hum zo lo leh ṭhin. Leicester City leh Tottenham laka an goal neih hmasak pawh an hum thei lo. Spurs laka an goal chhuah danah Arteta a lawm lo, defender Sead Kolasinac-a'n holam takin a pass sual a, tlarhnung laia ding David Luiz a che rang tawk lo bawk; dan pangngaiin set-piece an tuar nawn leh bawk a ni.

Spanish manager Arteta-a'n ball sem thei Luiz chhawr ṭangkai tum viau mah se tihsual a ching. Reds hmatawng Mohamed Salah, Sadio Mane leh Roberto Firmino te hmaah tihsual neih a thiang dawn lo, chetsual palha khingpuite hrem nghal thei vek an ni.

Gunners hian Liverpool laka point hlawh chhuak tur chuan an ṭhat dan bera an khelh chhuah a ngai dawn, chutih rualin Inrinni zanah Manchester City nen FA Cup semifinal an khel chhunzawm dawn - manager tawnhriat la ngah lo Arteta tan ngaihtuah tur a tam dawn.

July 13, Thawhṭanni zan

Manchester United    2 - 2    Southampton

MAN : Marcus Rashford 20'; Anthony Martial 23'

SOU : Stuart Armstrong 12'; Michael Obafemi 90+6'

Nizan Inkhel (Result kan hre hman lo)

Chelsea    12:45 AM    Norwich City

Zanin Innkhel Tur

Burnley    10:30 PM    Wolverhampton Wanderers

Manchester City    10:30 PM    AFC Bournemouth

Newcastle United    10:30 PM    Tottenham Hotspur

Arsenal    12:45 AM    Liverpool

July 16, Ningani zan

Everton    10:30 PM    Aston Villa

Leicester City    10:30 PM    Sheffield United

Crystal Palace    12:45 AM    Manchester United

Southampton    12:45 AM    Brighton & Hove Albion

July 17, Zirtawpni zan

West Ham United    12:30 AM    Watford