State FA aiawhten COA an hmu FIFA-in AIFF a ban dâwn em?

India rama football buaina kal zelah July 5 & 6 khan State Football Association aiawh mi pasarihte chu New Delhi-ah inhmu khawmin buaina chinfel nan kawng an dap zel a, FIFA hun tiam hmaa AIFF dan thar a awm hman loh chuan FIFA-in a ban theih dinhmunah AIFF a la awm zel.

AIFF President hlui Praful Patel-a'n a huna inthlan a buatsaih loh avang leh National Sports Code a bawhchhiat avanga Supreme Court-a thubuai thehluhah SC chuan AIFF chu thiam loh chantirin president leh a thawhpuite chu an nihna a hlihsak a, dan pui thar siam leh inthlan ṭhat hma AIFF enkawl turin Committee of Administrators (COA) mi pathum a ruat.

Buaina chungchang chingfel turin State FA inhmu khawm chuan mi pasarih an thlang chhuak a, anni hian COA vawi thum an dawr tawh bakah tun hnaiah FIFA aiawha lo kalte an kawm tawh bawk.

FIFA hian AIFF chu July 31 hma ngeiin constitution thar nei tur leh September 30 hmaa hruaitu thar thlang turin a hrilh a, he hun tiam hi bawh pelh lo turin COA chu a chah chiang hle bawk a ni.

COA hian mi hrang hrang be kualin constitution thar hi a buaipui a, State FA lam nen pawh an inbe pawp reng a ni. He dan duan tharte chu FIFA dan pui leh National Sports Code mil a ni tur a ni a, chumi hnuah Supreme Court pawmpui a la ngai a ni.

Dan thar hi a hun takah neih theih loh chuan FIFA-in AIFF hi a ban dâwn a, hei hian nghawng ṭha lo tak a nei ngei ang. FIFA ban pumpelh tur leh hma lama kal zel dan ngaihtuahin State FA aiawhte chuan AIFF secretariat leh COA an dawr nawn leh a, an aiawha SC lama ding tur lawyer-te dawrin hma an la zel a ni.

Dan duan thar hi SC-ah khing lettu an awm a, a huna constitution peih hman a nih loh chuan FIFA ban hi hmabak a nih avangin kawg hrang hrangin indawrna a kal zel a, hetihlai hian constitution duanah COA leh State FA lamin inrem lohna an nei zauh zauh a, SC lama AIFF khingtu lamin duh dan an lo nei bawk nen, FIFA ban hi pumpelh theih a nih dâwn leh dâwn loh hriat a harsa ta hle a ni.

State FA aiawh hian Mizoram Football Association Honorary Secretary Lalnghinglova Hmar a tel a, ani balah hian West Bengal, Punjab, Odisha, Karnataka, Delhi leh Gujarat FA aṭangin thlan chhuah an ni.