Bawngkawn hmaah Hlimen

LBS Suzuki All Mizoram Inter Village Football Tournament 2022 chu vawiin hian team 64 awmna third round khelh zawh a ni dawn a, match hmabak pali hi RG Stadium, Mualpuiah khelh a ni ang. En châkawm ber tura ngaih chu tlai dar 2:00-a Bawngkawn leh Hlimen inkhel hi a ni thei ang.

Bawngkawn hi tualchhung football-ah chuan 'star' rual tih theih an ni a; MS Dawngliana, H. Lalmuankima, Ronald Zothanzama, Lalnuntluanga, Isak Vanlalruatfela, Immanuel HS Lalṭhazuala, KC Larchhuakmawia leh David Lalbiakzara te awmna an ni. Amaherawhchu an khingpui tur Hlimen tlarhnungah Aizawl FC defender ṭha Lallawmawma a awm a, midfielder Vanlalṭhazuala leh tawnhriat nei ṭha Lalbiaknunga te an awm - eng result pawh a thleng thei tlat.

Inkhel erawh zing dar 8:00 aṭangin a inṭan dawn a, Thenzawl West leh Saron Veng te an inkhel ang. Thenzawl West hian Durtlang an hneh hnuah College Veng an hneh leh theih avangin an vannei ringawt lo - an ṭha. Saron Veng lakah an buk a rit zawk ang.

Bilkhawthlir North leh Tuithiang te chawhma dar 10:00-ah an inkhel dawn. Bikhawthlir North hian Aizawl veng pahnih Nursery Veng leh Chanmari West te an hneh tawh. Mahse, fiahna tak tak chu Tuithiang lakah a ni thung ang. Coach Lalremruata enkawl Tuithiang hi team ṭha zawk tura ngaih an ni.

Chhun dar 12:00-ah Falkawn leh Ramhlun North te an inkhel dawn. Falkawn tan round of 64 thlen phak hi a ṭha a, mahse heta tawp hi an duh lo. Mahse Ramhlun North hian tawnhriat nei ṭha V. Lalchhuanawma leh goalkeeper Lalṭanpuia te an kawl a, round of 32 an thleng lo a nih chuan hlawhchhamah an inngai ang.

Round of 64 - Vawiin Inkhel tur
Saron Veng 8:00 AM Thenzawl West RG Stadium
Bilkhawthlir North 10:00 AM Tuithiang RG Stadium
Falkawn 12:00 Noon Ramhlun North LC RG Stadium
Bawngkawn LC 2:00 PM Hlimen LC RG Stadium