Lammualah Bethlehem VT Vs Vaivakawn

LBS Suzuki All Mizoram Inter Village Football Tournament 2022-a team ṭha awm tamna ber chu group D tiin a sawi theih. He group-ah hian Bethlehem Vengthlang, Chhinga Veng, Dinthar Veng, Republic Veng, Vaivakawn, Electric Veng, Serchhip Jt VC, Kolasib Ṭumpui bakah Champhai lam aṭanga team ṭha Champhai champion Melbuk, Zotlang, Kanan leh Zokhawthar te an awm.

Tunah erawh he group aṭang hian team pariat Zemabawk vs Republic Veng, Lungdai vs Kolasib Ṭumpui, Vaivakawn vs Bethlehem Vengthlang, Thakthing vs Champhai Kanan te chiah an dam ta. Vaivakawn hian team ṭha Electric Veng leh Chhinga Veng te an hneh tawh a, vawiin tlai 12:30 hian BVT an hmachhawn dawn - en a châkawm takzet.

Nimin khan BVT hian Sairang 6-1 in an hneh a, hemi ṭum hian defender pawimawh Lalmalsawma (Buanga) chu hrem vangin a khel lo a, midfielder ṭha mi K. Lalṭhathanga (Puitea) chu inhliam vangin a khel lo bawk. Tualchhung football-a tawnhriat nei ṭha Lawmzuala Pautu hote hian Vaivakawn lakah sa huai an ser ang.

Vaivakawn hi team nem zawk niin lang mah se coach Lalruatliana Sailo (Tawia) enkawl an ni a, chakpui thei tur player an kawl bawk. India international Lalengmawia Ralte (Apuia) leh keeper Lalbiakhlua Jongte te hi ṭhatpui tham an ni a, an ṭhatpui bawk. Lammual inkhel hi Zonet chuan live-in YouTube leh TV lamah a pe chhuak a, a hmuna kal hman lo tan pawh hmaih phal chi a ni lo ang.