Man United an bazar ṭan e - Malacia an lalut
Manchester United chuan an coach thar Erik ten Hag hnuaiah a vawi khat nan player an lalut ta a, Feyenoord full back Tyrell Malacia chu June 2026 thleng an hnena khel turin contract an ziahpui.
Dutch defender hi a contract ang chuan kum li chhung Old Trafford-ah a cham dawn tihna a ni a, a khelh dan a zirin kum khat dawng pawhsei theih tura tih a ni bawk.
United chuan Netherlands international manah hian pound maktaduai 13 an seng a, a khelh dan a zirin £1.7mtd chu pek belh tur a ni ang.
Red Devils hian Denmark midfielder Christian Eriksen chu free transfer-a lalut turin inremna an neihpui tawh bawk a, he thuziak i chhiar meuh chuan an inlalut fel tawh hial mai thei.
Theihtawp chhuahin
Kum 22 mi Malacia chuan, "He club ka zawm thei hi ka hlim hle a, ka tan chuan bung thar a ni - league tharah, ṭhian tharte nen kan khel dawn a, manager ṭha takin min kaihruai dawn bawk," a ti.
Malacia chuan an coach Ten Hag fak zuiin, "Eredivisie-a a team enkawl (Ajax) kan hmachhawn aṭangin a quality ka hria a, a player-te aṭanga a beisei ṭhin ka hre bawk," a ti a, a coach hriatchian a zawm thu a sawi.
French club Lyon nen pawha sawizawm hlawh hman defender chuan, "Player naupang, hmasawnna tur la nei lai ka ni tih ka inhria a, chutihrual chuan United jersey ka hak apiangin ka theihtawp ka chhuah zel ang, tiin United fan-te ka tiam thei a ni," a ti.
Manchester United striker hlui Robin van Persie chuan, "United fan-te, he club ropui tak tana Tyrell inkhel hi hmuhnawm in ti hle ang tih ka tiam ngam che u a, talent nei ṭha tak, theihtawp chhuah ṭhin a ni a, United hian in tifuh hle ang tih ka sawi ngam a ni," tiin a Dutch pui chu a fak hle.
Tu nge Malacia?
Netherlands tana vawi nga inlan tawh Malacia hi Feyenoord aṭanga inzir chhuak a ni a, Dutch left back hian club dang tan a la khel ngai lo - December 2017 khan Feyenoord tana a match hmasa ber a khel a, hemi season-ah hian KNVB Cup-ah a champion pui.
Feyenoord tana a season hmasa berah hian match 14 chiah a la khel a, mahse, season hmasaah meuh kha chuan inelna hrang hrangah match 50 a khel tawh - goal 1 khungin assist vawi nga a nei.
UEFA Europa Conference League final-ah a team a hruai thleng a, ECL team of the season-ah a lang phak hial. Dutch left back hi 5 ft 7 in-a sang a ni a, Ten Hag-a hriatchian sa a nih avangin Red Devils-ah hmun pawimawh chang nghal tura ngaih a ni.
United chuan Thawhṭanni khan Malacia hi lakluh fel theih an inbeisei tawh zawk a, mahse, work permit a fel lawk theih loh avangin an duh anga rangin an tifel thei lo - tunah erawh engkim a chiang ta.
Beiseina
United football director John Murtough chuan, "Tyrell hi player hmuhnawm, thatho tak, a kum zat angah chuan tawnhriat nei ṭha tak a ni a, Eredivisie-ah season nga khel tawhin, European final-ah a inlan tawh a, Netherlands tan a inlan tawh bawk.
"Erik ten Hag leh a coaching team-te kaihhruaina hnuaiah hmasawn zel turin kan beisei a ni," a ti a, Malacia chungah beiseina a nei sang hle.
Red Devils hian Thailand leh Australia-ah pre-season tour an nei dawn a, Zirtawpnia an zinchhuah hunah Malacia hi team rualin zin chhuak ve hman tura ngaih a ni.
Hetihlai hian Cristiano Ronaldo zin ve dawn leh dawn loh erawh he thu buatsaih a nih thleng hian a la chiang thei lo a, Portuguese forward hma hun hi United fan-ten chiang zawka hriat vat an duh ang.