AC Milan striker thar Origi

Liverpool striker chhuak ta Divock Origi chuan AC Milan chu free transfer-in a zawm a, San Siro-ah hian kum li chhung khel turin contract a ziak.

Belgium international hian season zawh rual khan Liverpool-a a contract a hmang zo a, Anfield-a contract thar ziak loin Milan khawpui lamah a inpulut ta a ni.

Kum 27 mi striker hian kum 2014 khan Reds hi a zawm a, mahse, a club khelhna Lille-ah loan-a kir tir a ni a, kum 2015 aṭang khan Reds jersey a ha ṭan ve chauh.

Merseyside club tan hian match 175 khelin goal 41 a khung a, assist vawi 18 a nei bawk. Goal khung tam tawk lo mah se goal pawimawh bik a khung theih avangin Reds fans zingah ngainat a hlawh hle.

Champions League 2019 semifinal-a Barcelona laka comeback ropui an lantirna inkhelah khan goal hnih a khung a, first leg-a 3-0 a an ngam loh team hi 4-0 in an lehthal.

Final-a 2-0 a Tottenham Hotspur an hnehna inkhelah an goal hnihna a khung a, Premier League, FA Cup, League Cup, Champions League, UEFA Super Cup leh FIFA Club World Cup-ah te Liverpool hi a champion pui a ni.

Season hman zawh takah khan Reds tan inelna hrang hrangah match 18 khelin goal ruk a khung a, assist vawi li a nei - match 13-ah bench aṭanga luhtir a ni a, a bul ṭan vawi ngaah match thum a khel tluan lo bawk.

Milan hian season hman zawh takah khan Serie A nomawi an chawi a, Origi hma hian season hmasaa loan-a an hawh Alessandro Florenzi chu AS Roma aṭangin euro maktaduai 2.7 bawr velin a nghetin an lalut tawh bawk.