Jabeur hmachhawn tur Maria

Mumang ramah Ons Jabeur a cheng mek - Tunisian nula hian Wimbledon semifinal a thleng, final lut tur erawh chuan Tatjana Maria a paltlang leh a ngai dawn. Zanin hian Centre Court-ah chungnung zawk nih an inchuh chhunzawm leh nghal ang.

Thawhlehni zan quarterfinal inkhelah, seeded pathumna Jabeur chuan Marie Bouzkova 3-6, 6-1, 6-1 in a hneh. African nula zingah Wimbledon champion thei an la awm ngai lo, Jabeur hian mellung pawimawh phun turin match hnih chak a la mamawh.

Kum 27 mi Jabeur hi world number 2 a ni mek a, player la dam zingah chuan a ranking a sang fal nalh. Jabeur chuan, "Inkhelh hmain Hicham Arazi ka bia, ani hi Moroccan nula niin Arab player-te chu quarterfinal-ah an tlak nasat ṭhin thu min lo hrilh.

"Quarterfinal khel tur khan rilru ka seng nasa em em a, taksa lam pawh ka inbuatsaih ṭha. Set khatna ka hloh phei kha chuan inrintawk lohna a lian hman, a tawpah erawh ka beidawn duh loh avangin ka vannei ta hram," tiin a sawi.

Inkhel dangah Tatjana Maria chuan Jule Niemeier 4-6, 6-2, 7-5 in a hneh. World number 103 Maria hian dai ngai loh ram a dai mek a, kum 34 a tlin hnuah Grand Slam bika a thlen san ber ṭum a tawng mek - a mumang hi chhunzawm zel a duh ngei ang.