Mizoram Lockdown (inkharkhip) Ni 115

Manchester United leh England legend David Beckham khan a vanglaiin ram tan match 115-a khel hman a, goal 17 a khungsak. England 'golden generation' tih hiala an koh team-ah Beckham hi tel mah se ram tan erawh nomawi lian tham chawi a nei miah lo a, October 6, 2001-a Greece laka a goal khung erawh English football-ah theihnghilh a ni tawh ngai lo ang. Three Lions hian World Cup 2002 qualifier-a an match hnuhnung berah Greece hi an hmachhawn a, World Cup khel tura inpetkai turin draw emaw chak an mamawh.

Old Trafford, Manchester-a inkhelah 2-1 a Three Lions an hnufual reng hnuin Beckham hian hun pek belh minute thumnaah freekick hmangin goal a khung a, England hi World Cup khel turin an tlin phah! Major League Soccer club thar Inter Miami neitu leh president ni bawk Beckham hian 1992-93 season khan Manchester United-ah a career a ṭan, 1994-95 season-ah loan-a Preston North End a pan zawk tih loh chu United tan 2002-03 thleng a khel. 

United aṭang hian Real Madrid a pan a, kum 2007 thleng a khel. MLS club LA Galaxy-ah a kal leh a, AC Milan-ah ṭum hnih loan-a kaltir niin 2012-13 season khan Paris Saint-Germain-ah a football career-a a hun hnuhnung chu a hmang a ni. Red Devils tan hian Premier League (6), FA Cup (2), FA Charity Shield (2), Champions League leh Intercontinental Cup (1) nomawi a chawi a, Real Madrid tan La Liga (1) leh Spanish Super Cup (1)-ah a champion bawk. LA Galaxy tan MLS Cup (2) leh Supporters' Shield (2) nomawi a chawi a, PSG tan Ligue 1-ah a champion bawk. England Player of the Year-ah vawi khat thlan a ni a, UEFA Team of the Year-ah vawi hnih a lang. Kum 1999 khan Ballon d'Or-ah pahnihna a ni a, kum 1999 leh 2001 khan FIFA World Player of the Year-ah pahnihna ve ve a ni bawk.