Bye Bye hun kan thleng leh ta ; Mission Veng Vs Tuikual South

Mizoram Super League tingaihnawmtu chu Mission Veng Vikings leh Tuikual South te an ni a, 'bye bye inkhel' tiha sawi theih a ni. Tualchhung basketball-ah inelna nung tak thianghlim si an lantir thei hi an fakawm a ni.

Zanin dar 8:00 hian Hawla Indoor Stadium-ah MSL3 semifinal thawhhnihna khelh a ni dawn a, game 1 chauh la ni mah se boruak a ṭang nghal ang.

Vikings an lian
Mission Veng Vikings-in MSL3-a an match hmasa berah Zarkawt Serpents hneh mah se rematch tura MSL Board-in thutlukna an siam avangin chak hmel an hmu har hle.

Vikings hian kai thar Chan­mari Hollow BBSP an hneh loh hnuah Ronald March leh Rikin Pethani te telin Zarkawt BCA an hneh lo. Mission Veng an zuih ral tawh tura ngaih a nih hnuah American player March-a'n a thiamna a pholang a, MSL-a khel India player ṭha ten National Camp an zawm leh tak bawk avangin Vikings hi champion tura rinkai an ni.

March a hmuhnawm
Mission Veng hian tun sea­son-a bye bye hmasa ber thlen theih nan semifinal luh theih nan Tuikual South 86-75 in an hneh a, hemi ṭum hian March chuan point 44 zet a khung.

Vikings player March hi MSL All Star-a Slam Dunk inelnaah chiang takin pakhatna a ni a, tun season-ah MVP nih phu khawpin inelna pangngaiah a ṭangkai bawk.

Mission Veng manager H. Lalhruaitluanga chuan, "UBA-ah March-a khel hi kan hmu a, dunk a awlsam tih leh 3-points a khung thei tih chu hi tlanghriat a ni. Kan club budget tihsan phah hiala kan lak ngam chhan chu a defending ṭha hi a ni a, player ṭha a ni," tiin an player a chhuang hle.

Team chungchang sawiin Ahruaia chuan, "Tun season-ah vawi 82 kan practice tawh a, kan thawkrim a ni. Mizo player-te hi season ṭantirh lamah beisei pha lo mah se anmahni inrintawkna tura March leh Pethani kan lak hnuah chuan an theihna an pho chhuak tawh. Kumin hi Mizo player kan neih ṭhat ber ṭum a ni," tiin a player-te a fak.

Tuikual an zam lo
Tuikual South manager Lalremsiama Hrahsel chuan, "Keini aiin pressure an ngah zawk ang. Kan match hnuhnung bera kan chak loh chhan kha chu keini aiin chak an mamawh a, an ṭang rei thei zawk a ni. Tunah chuan chak kan mamawh dana inang chiah a, an ṭhat lai taka hneh kan duh," tiin Vikings an hlauh loh thu a sawi.

TKS hian Palpreet Singh Brar leh Amjyot Singh Gill te an chhawr thei dawn lo a, foreign player an lak thar Daniel lah chhuan tham a tling lo. Congo aṭanga India rama lehkha zir tura rawn kal Daniel hi a san ṭhat avangin Phengphehlep-in squad tihchhah nan an lalut a, rinrawl tur a ni lo.

Phengphehlep tan ṭum dang zawng aiin Mizo player an ṭangkai dawn a, sum an hman tam ber ṭuma final thlen zawh loh an duh lo ang.

Bye Bye boruak
Mission Veng manager Ahruaia chuan, "Bye bye hi chuan nghawng a nei ngei a, mipui chauh ni loin player-ah pawh phurna a pein ka hria. Tuikual South hi ṭantu nei ṭha an nih avangin Vikings chhungkua kan thawhchhuah ṭhat a ṭul lehzual a ni. Pu Jeffrey L. Fanai-in fan-te kal nan bus min pe tawp a, mimal takin a chungah lawmthu ka sawi duh a ni," tiin Vanglaini a hrilh.

Tuikual South manager Siamtea chuan, "Keimahah chuan bye bye hian nghawng a nei hran lo a, team chhungah pawh kan sawi ngai lo. Fan lamah chuan boruak a san phah tih an sawi fo a, amaherawhchu keini chuan bye bye vang ni loin final theng turin chak kan duh a ni," tiin a sawi.

MSL3 semfiinal hi best of three a khelh tur a ni a, zanin hi game 1-na a ni.