Spurs dahsangtu Slaven Bilic
Zanin dar 12:30 hian West Ham chuan league match khel turin London Stadium-ah Tottenham Hotspur an mikhual dawn. Hammers manager Slaven Bilic chuan an khingpui tur chu dan ngaihna awm lo khawpa ṭha nia a hriat thu a sawi mauh mai!
Mauricio Pochettino naute hian hnehna an chang a nih chuan Premier League hmahruaitu Chelsea an phak lohna chu point khat chiah a ni dawn. English striker Harry Kane chuan point thum an hmu a nih chuan Thawhṭanni zana inkhel ve chauh tur Blues tan pressure na tak an siam dawn tih a lo sawi lawk.
Tottenham hian an match hnuhnung berah Arsenal 2-0 in an hneh a, league match bikah a zawnin vawi li clean sheet an nei a, goal 11 khung thung. An tlarhnung a phui ṭhat bakah an hmatawng an hriam hle tih a chiang.
Kum 48-a upa Bilic chuan, "Tun season-ah Spurs hian hliam vangin Harry Kane ṭum hnih an chân tawh a, hetiang chunga Chelsea nen an inkar a zim thei hi a mak ka ti. Thla hnih chhung zet chu an khel ṭha tluang takzet a, ball an in pe kual nasain an khingpui a chhaih buai thei hle - engkimah an ṭhat lai an tawng a ni ber," a ti.
Bilic hian a naute pawhin hmasawnna an ngah thu a sawi tel a, an khingpui tur lakah rilru game a khel nge a rilru chhungril takin a fak tih a hriat loh. London club te hi inngeih tia sawi tur an ni ngai lo a, he vang hian Croatian manager hian Spurs player-te a chhaih niin a ngaih theih bawk.
Season hmasa an khelh ṭhat vanga Europa League khel West Ham hian tun season-ah beisei an phak lo hle. Match 35 an khelh aṭangin point 39 bak an hmu thei lo a, relegate thei dinhmuna ding Swansea City nen an inkarah point sarih chiah a awm League match khelh hmabak pathum an neihah an dinhmun a la him lo tihna a ni.
Team pahnihte hi nikum November 19 khan White Hart Lane-ah an intawng tawh a, Spurs hian hun tawp dawna Kane penalty chhuih luh hmangin 3-2 in hnehna an chang. England international striker hian Gunners lakah penalty a chhuih lut leh chiah a, season kal laia league goal 21 khung tawh Kane hi ven ngun ngai bik a ni ang.