Vawiinah BC Roy Trophy final Mizoram Vs Punjab
National Junior Football Championships final-ah vawiin tlai dar 3:00 hian Mizoram leh Punjab an inkhel dawn a, inkhelhna tur hmun hi Pant Stadium, Bhilai, Chhattisgarh a ni.
Khaw lum hnuaiah
Mizoram team enkawltuten Chhattisgarh an thlen aṭanga an sawi nasat ber chu khaw lum a ni a, inkhelh hun laiin 40 degree celsius te a nih ṭhin avangin 'water break' te neih a ni hial. Vawiin hi Mizoramin Bhilai an thlen aṭanga ni 12-na chiah a ni a, khaw lum tawrh pawh ngaiah an nei chho ṭan tawh ang.
Amaherawhchu final hi group match khelh hun aia darkar khata tih hma a nih avangin Mizo player-te nomawi chawi turin an tawrhchhel a ṭul dawn a ni.
Final rematch
Nikum February thla khan Punjab-in BC Roy Trophy hi an ramah a thleng a, final-ah Mizoram nen an intawng. Hun pangngaiah 1-1 a nih hnuin penalty shootout-ah Punjab 4-2 in an chak.
Mizoram manager Hmingthansanga chuan, "Kum 2013-a Mizoram kan champion ṭum khan semi final-ah Punjab 3-1 in kan hneh a, kha mi ṭum khan kan player pakhatin red card a hmu a, chutichung chuan 3 -1 in kan la chak thei a ni," tiin an khingpui tur a hlauh bik loh thu a sawi.
Final-a an khingpui tur chungchang sawiin Hmingsanga chuan, "Punjab hi Bilaspur lamah an khelh daih avangin eng ang chiaha ṭha nge tih kan hre lo a, chutiang bawkin kan ṭhat dan an hre bik lo. Inelna hnuhnung berah penalty shootout hmangin final-ah Mizoram an hneh a, an vanneih zawk vang a ni," tiin phuba lak ngei a tum thu a sawi.
Punjab hi lian tura a ngaih an ni a, India rama football-a record nei ṭha ber zinga mi an ni. Mizoram coach C. Vanlalhriatrenga chuan, "Keinia aia lian hmachhawn tur kan ni a, chuvangin Mizote ṭhatna ber ground ball in kan khel ang," tiin an khelh dan tur hmang a sawi.
Mizoram team zingah hliam tenau nei an awm nual a, amaherawhchu final-ah chhawr theih vek an nih beisei a ni.
Mizoram an vannei
Kumin BC Roy Trophy hi Bhilai leh Bilaspur-ah khelh a ni. Mizoram hian group stage leh semifinal Bhilai-ah an khel a, helai hmun hi final khelhna tur a ni.
Punjab erawhin group stage leh semifinal Bilaspur-ah an khel a, khaw pahnih inkar hi 141.9 km niin darkar nga bawr vel zin a ngaih avangin Mizoram angin hahdamna hun ṭha an nei ve lo.
Mizoram manager Hmingsanga chuan, "Pant Stadium-ah hian vawi li kan khel tawh a, kan chak vekna hmun a nih avangin kan inringtawk hle. Punjab aia hahdamna hun ṭha kan neih hi kan tan chuan ham ṭhatna a ni," tiin champion tura an dinhmun a ṭhat thu a sawi.
An inlungrual
Mizoram team hian final thleng turin goal khat chiah an la chhuah a, goal 11 an khung tawh. Team enkawltuten an sawi hmaih ngai loh chu an inlungrualna a ni.
Hmingsanga chuan, "Kan naute hi an inpe em em a, thu an awih bawk. Coach pahnih Hriata leh Rova ten ṭhahnem an ngai a, team boruak a ṭha bawk. RG Stadium-a camp-a kan awmpui Mizoram Sub Junior team an champion leh I League-a Aizawl FC champion hian nasa takin min tiphur a, kan tana ṭawngṭaitute chungah kan lawm a, min ṭawngṭai pui zel tur pawhin kan ngen nghal bawk," tiin thawhhona ṭha an neih thu a sawi.
Mizoram assistant coach Vanlalrova chuan, "Player mal khaia ṭha bik sawi tur ka hre lo a, kan thawhhona ṭha hi kan inchhuanna ber a ni. Team ka enkawl hnua Mizoram tih chuang ka vawi khat hakna a ni a, ka tan chuan a hlu khawp mai," tiin Vanglaini a hrilh.
TFA academy chhuak Rova chuan an inkhelh hun lai nena khaikhin dan a thiam loh thu a sawi rualin a lung erawh a tihlen thu a sawi tel thung.
Final Kalkawng
Group Stage
April 26, Nilaini
Mizoram 5 - 0 Uttarakhand
MIZ : Lalṭhapuia 22', 69'; Lalthanmawia 43'; Zakaria Lalhriatpuia 57'; Lalhruaitluanga 83'
April 28, Zirtawpni
Delhi 0 - 2 Mizoram
MIZ : Lalruatfela 43'; Lalremmawia 83'
April 30, Pathianni
Mizoram 2 - 1 Jharkhand
MIZ : Lalruatpuia 32'; Lalremmawia 56'
Semifinal
Mizoram 2 - 0 West Bengal
MIZ : Lalremmawia 39'; Lalruatpuia 49'