FIFA ranking Top 100-ah India

Kum 21 hnua a vawi khat nan India chuan FIFA ranking-a top 100 huang chhung a dai lut ve leh ta. Nimin khan FIFA chuan ranking thar ber a ti chhuak a, India hian pen khata hma sawnin 100-na dinhmun a luah a ni.

Stephen Constantine en­kawlna hnuaia khel India hi Lithuania, Nicaragua leh Estonia te nen 100-naah hian an awm ho a, Asia-ah chuan 11-na dinhmun an luah. Tun hi India-in FIFA ranking-a top 100 huang a invawrhkai vawi rukna chauh a ni a, an tawn san ber ṭum chu February 1996 khan tawngin 94-na dinhmun an lo luah tawh.

India-in April-ah match khelh nei lo mah se top 100-a an awm theih chhan hi April-a 100-na dinhmun luahtu Malawi-in match hnih ngawt tlawm hmel hmua 113-naa an tlak vang a ni a, Malawi vang hian thla hmasa ranking 101-113 inkarte chuan hma an sawn vek a ni.

South Asian Football Federation (SAFF) hnuaiah India a sang fal hle a, Maldives (151), Bangladesh (193), Nepal (172), Bhutan (164), Sri Lanka (197) leh Pakistan (201) te nen an la in­thlau rih hle. India hian tun hnaia hetiang taka hmasawn tur hian an match hnuhnung 12-ah vawi 10 chak hmel an hmu thei a ni.

FIFA ranking pumpuiah Brazil chuan a chung ber an luah chhunzawm zel a, Argentina (2), Germany (3), Chile (4), Colombia (5), France (6), Belgium (7), Portugal (8), Switzerland (9), Spain (10) ten an dawt a, Mizote ngaihven England chu 14-na an ni.