Monaco ngawihtirtu Higuain

Europe club zinga goal khung thei berte zinga mi AS Monaco lakah Juventus tlarhnung a phui a, striker Gonzalo Higuain goal hnih vangin Ligue 1 hmahruaitu an ngawi. Nilaini zan Champions League semifinal first leg inkhelah Juventus hian 2-0 a hnehna an chan avangin final khelhna tur Millennium Stadium, Cardiff an sawi ri ngam tawh ang.

Allegri thluak

Stade Louis II-a inkhelah Massimi­liano Allegri-a'n a naute a siksawi; hrem vanga khel thei lo Sami Khedira aiah Claudio Marchisio-a'n inkhel bul a ṭan a, defender Dani Alves chu mual ding lamah zalenna pek a ni.

Tlarhmaah Higuain chu maltlatin Argentina striker thlawp tur hian Paulo Dybala leh Mario Mandzukic an awm - keeper Gianluigi Buffon chuan Juventus tan Champions League match 100-na a khel chiah bawk.

Leonardo Jardim-a'n tun season kal laia a hmanthiam 4-4-2 formation hmang bawkin a naute a rem ve leh thung a, tawnhriat ngah Radamel Falcao leh Kylian Mbappe te tlarhmaah an inkawp.

Hei le Higuain

French club hian inkhel bul an ṭan ṭha zawk, kum 18-a upa Mbappe hian Buffon tan hna hautak ṭum hnih a siamsak nghal - a ball tauh leh lei hrula a hlap kawh zet chu kum 39-a upa Buffon-a'n a dan sak.

Juve hian hun remchang an neih chhunah na takin an nawr let nghal zat zel. Alves leh Higuain ten mawi zeta ball an inpek hnuah Brazil defender hian a kheng let zauh a, khawvela player manto pathumna Higuain-a'n minute 29-naah mawi zetin a hlap lut. Old Lady (Juventus sawina) lamin chawlhlawk laiin si khat faiin hma an hruai.

Second half-ah Monaco lamin an siphurh sut ngei an tum, minute 47-na lekah mawi zetin Juvenus an nawr thut a, midfielder Bernardo Silva ball pek dawngtu Falcao-a'n Buffon chauh a hmachhawn tawhah ball a pet na tawk lo - Juve an him leh phawt.

Italian champion hian Alves leh Higuain hmang bawkin an bei let, minute 59-naah ball pet thiam Alves a cross chu laklawh nei miah loin Higuain-a'n a khung pawp. Monaco tlarhungin pound maktaduai 78 man striker an veng uluk tawk loah a ngaih theih, goal dang a lut zui tawh lo.

Kum 29-a upa Higuain hian Turin club tan a season khatnaah inelna hrang hrangah goal 31 a khung ta a, Champions League bikah hian Marseille (2013) hnuah match khata goal hnih a khung lehna hmasa ber a ni.

Italian manager Allegri-a'n defender Alves a khelh tir danah thutlukna a siam sual lo, Barcelona star hlui hian ball vawi 72 zet tawkin ani aia khawih hnem an awm lo. Monaco player-te ball chan vawi 10 zet a chhuhsak bawk, khualmuala hnehna an chan theih nana player pawimawh leh langsar a ni.

Turin kulhpui

Juventus hian Champions League bikah minute 621 chhung goal an chhuah ta lo. Match ruk chhung clean sheet an neih hi an club record thar a ni. Keeper Buffon-a'n Monaco goal khung tur vawi nga a dansak thei a, an khingpui goal nawr tam zawk chu defender tawnhriat ngah Giorgio Chiellini, Leonardo Bonucci leh Andrea Barzagli ten an dang chat thei.

Team ṭha bera ngaih Barcelona chu quarterfinal aṭangin 3-0 in an pet chhuak thei a, kum 2015 final-a an hneh loh laka phuba an lak danah hian nomawi an inchuh ṭum ai khan an ṭha zawk tawh niin a ngaih theih.

Barca an hneh hnuah kum 2015 November thla aṭanga mahni khelmuala goal khung ziah Monaco lakah an goal an venhim theih leh tak avangin Allegri naute hi Europe team ṭha berte zingah chhiar hmaih theih an ni lo ang.

Eng nge an sawi?

Juve manager Allegri chuan, "Gigi Buffon khan khawvela goalkeeper ṭha ber a nih zia a lantir leh ta. Monaco kha an hlauhawm em em a, chutichung chuan an goal kan venghim thei. Kan mamawh hunah tak Higuain a rawn lang thei zel bawk, beiseina kan neih san rualin inkhel a la tawp lo tih kan hriat tel a ngai," a ti.

Monaco manager Leonardo Jardim chuan, "Ka naute sawiselna tur ka hre lo, tawnhriat ngah player kan hmachhawn a, a vanduai zawkah kan ṭang mai a ni. Turin-ah chuan kan mamawh zat goal khung turin kan thawhrim a ngai hle ang," a ti.

Hmabak

Juventus hian Inrinni zanah Torino an mikhual zui dawn a, hnehna an chang a nih chuan Serie A nomawi an chawi tawh ang. Turin club hian Copa Italia final an luh tawh bawk avangin nomawi lian pathum chawi thei dinhmunah an ding mek.

Monaco lamin Inrinni zanah tho Nancy an lenchilh ve nghal dawn. Monaco hian kum 2000 hnua a vawi khat nan league nomawi an beisei mek a, inkhelh hmabak pali la awmah point ruk an hmu thei a nih chuan an champion ang.