Sawi hlawh Sharapova

World number 1 hlui Maria Sharapova chanchin chu tennis titi tui ber pakhat a ni chhunzawm mek. All England Club chief Richard Lewis chuan Wimbledon atan wildcard an pek dawn leh dawn loh an sawilawk theih loh thu a sawi chhuak ve leh ta.

Russian star hi nikum Australian Open-ah khan dandawi hman phal loh a hmang tih hmuhchhuah a nih avangin thla 15 chhung hrem a ni a, kar hmasa khan Stuttgart Open-ah inlanin semi­final-ah a tla.

Grand Slam inelna bikah main draw khel turin world number 100 chin nih a ngai a, qualifying khel tur pawhin numnber 200 chin tal nih a ngai. Player duhsak bik tan wildcard pek ṭhin an ni bawk - tun dinhmunah Sharapova hi world number 262 a ni.

Richard Lewis chuan, "June 20 hian kan inhmukhawm dawn a, he hunah hian Wimbledon khel tur kan tifel ang. Tunah chuan thil sawilawk vak theih a ni rih lo. Inelna kan neih hma chawlhkar hnih a la awmah wildcard chungchang pawh ngaihtuah a ni chauh ang," tiin a sawi.

Kum 30-a upa Shara­pova hi Stuttgart bakah Madrid leh Rome Open buatsaihtute chuan wild­card an pe tawh a, hmei­chhe tennis player dangten hei hi na tak takin an sawisel tawh a ni.

French Tennis Fede­ration pawhin May 16 hian French Open atan wildcard an pek dawn leh dawn loh an ti chiang dawn. Roland Garros hi May 28 aṭanga June 11 thleng khelh tur a ni - Wimbledon hi July 3 aṭanga khelh ṭan tur a ni thung.