Cristiano Ronaldo leh goal thum

Champions League semifinal-ah Cristiano Ronaldo-a'n hattrick a siam a, an hmelma kumhlun Atletico Madrid laka goal thum a khung hian Portuguese forward hian a career-a hattrick a siam vawi 47-na chiah a ni.

Ronaldo goal khung theih zia kan hria a, a thiam bik zia pawh hrilh nawn kan ngai lo. Mi tam takin kan hriat tel loh erawh hattrick 47 phena Ronaldo sulhnu a ni a, hattrick 47-in ken tel thawnthu ropui tak a nei.

47 & United

Football khawvelin Ronaldo a hmelhriat ṭanna chu Manchester United a ni a, kum 2003 khan amah chhertu Sporting Lisbon aṭangin United hi pound maktaduai 12.24 in a zawm. Ronaldo-a'n Real Madrid a pan hmain United tan season ruk a khel hman a, hetih chhung hian match 292 khelin goal 118 ngawt a khung.

Thil mak tak erawh Ronaldo-a'n United tan goal 100 chuang ngawt a khung chung hian Red Devils tan hattrick erawh vawi khat chiah a siam! January 2008 khan hetih hunlaia team talbuai leh manager nei lo Newcastle United chu 6-0 in an sawp a, heng zinga goal thum hi Ronaldo khung a ni - Portuguese forward hian season khat dang United-ah khelh chhunzawm mah se hattrick erawh a siam nawn tawh lo.

47 = tam tak!

Ronaldo-a'n hattrick 47 a siam tawh tia sawi mai a awlsam a, ngaihtuah chian loh chuan a tam zia hriat theih pawh a ni kher lo. Mahse, match tina goal khung harsatzia ngaihtuah tel hian hattrick siam harsat zia a lang a, vawi 47 ngawt siam phei chu tam tak a ni!

Hattrick 47 siam tling tura 'mi bik' nih a ngaihzia hrethiam tur chuan Premier League striker ropui tling phak ṭhah Alan Shearer, Robbie Fowler, Wayne Rooney, Thierry Henry, Michael Owen leh Harry Kane-ten Premier League-a an hattrick siam zat thlir mai tur - striker ropui parukin EPL-a hattrick an siam zat belhkhawm aiin Ronaldo-a'n vawi khatin hattrick a siam hnem zawk.

47 & World Cup

Kum 1930-ah World Cup hmasa ber khelh a ni a, vawiin thlengin khawvel huap ram leh ram inelna football tournament-ah hian hattrick vawi 50 siam a ni tawh - World Cup a hattrick siam tawh zat nihrual turin Ronaldo-a'n vawi thum bak hattrick siam a ngai tawh lo tihna a ni - Portugal captain theihna leh thiamna enin thil harsa niin a lang lo.

Ronaldo-a'n Champions League-ah goal 103 ngawt a khung tawh a, an hmelma Atletico Madrid-in Champions League-a goal an khung tawh zat aiin a tam zawk. Football ngainatu zingah Francesco Totti ropui zia inhrilh nawn a ngai lo, chu pawh Ronaldo ropuina belhchhahtu bawk! Italian striker-in Roma tan kum 25 a khelh chhungin Europe-ah match 103 a khel a, Ronaldo-a'n Champions League-a goal a khung zat nen a in ang!

Ronaldo vs Messi

Ronaldo ropui zia sawi a nih rualin Lionel Messi a lo lang nghal ṭhin a, Champions League bikah erawh Messi aiin Ronaldo a ropui zawk tih hi statistic-in min hrilh chu a ni. Portuguese forward-in hattrick siam nana goal a khung 27 zinga mi chu a lu hmanga a tauh luh a ni a, Messi-a'n Barcelona tan inelna hrang hranga a tauh luh tawh zat 22 aiin goal ngain a tam zawk.

Kum 32-a upa forward-in Champions League-a goal a khung tawh zat 103 hnaih bertu chu Messi a ni a, Barcelona thiampuipa hian goal 94 a khung tawh - Ronaldo hian goal dang khung tawh miah lo pawh ni se um phak turin goal kua a la mamawh tihna a ni. Hattrick siam lamah erawh Ronaldo hian Atletico laka a siam khan Messi a tluk ve chiah a, player ropui pahnih hian Champions League-ah hattrick vawi sarih ve ve an siam tawh.

United chungah Ronaldo

Ronaldo-a'n 2009-10 season a Real Madrid-a pan hnuah Spanish club tan Champions League goal 88 ngawt a khung tawh a, Spain lama a pem hnua Manchester United leh Manchester City-in Champions League-a goal an khung zat belhkhawm 86 aiin a tam zawk!

Champions League-ah Europe-a club ṭha ber nih tumin club 135 an inlan tawh a, heng zinga club 113-ten Champions League-a goal an khung tawh zat ṭheuh aiin Ronaldo-a goal khung zat 103 a tam zawk bawk.