Totti a chawl dawn ta
Roma legend Francesco Totti chuan season tawpah inkhelh a chawlhsan dawn. Italian striker ropui chawlh tur thu hi Roma sporting director Monchi chuan a puang a ni.
Kum 40-a upa forwatd hian kum 24 liam ta khan Roma tan a match hmasa ber a khel a, match 783 khelh sakin goal 307 ngawt a khung sak. Inkhelh a chawlhsan hnuah pawh Roma erawh a la chhuahsan dawn chuang lo - a career a hman zawhna club-ah hian director dinhmun a chelh chhunzawm dawn.
Monchi chuan, "Roma leh Totti chuan tun season hi player anga a hun tawp ber ni tawh mai se tiin thutlukna kan siam a, he club-ah hian director a nih chhunzawm ang. Totti hi ka bula hnathawk turin ka duh a, Roma awmzia hi min hrilh turin ka duh a ni," a ti.
Kum 2006-a Italy tana World Cup nomawi lo chawi tawh Totti hian Roma tan Serie A nomawi pakhat bakah Coppa Italia vawi hnih a chawi a, a vanglaiin club lian zawk aṭangin sawmna hmu ṭhin mah se a hmangaihna hmasa bansan duh loin Roma-ah a cham zel.
Season hmasa khan Totti hi chawl tura beisei ni tawh mah se season khat dang khel turin contract a ziak a, tun season-ah Roma tan match 25 khela goal thum khungin match tam zawk hi substitute bench aṭanga tlan lutin a inlan.