AFC Cup Jeje goal khung zanah Bagan chak lo

Mohun Bagan tan Mizo tlangval Jeje Lapekhlua'n goal khung mah se AFC Cup-ah a team a chhanhim zo chuang lo a, khualmualah Maziya Sports & Recreation Club chu 5-2 in an ngam lo - Kolkata club hian match li khelh tawhah vawi khat chiah hnehna an la chan avangin group stage an paltlang a beiseiawm tawh lo.

Season hmasa finalist Bengaluru pawh beisei loh takin khualmualah an tlawm a, Nilaini zan an intawn hmaa chak hmel la hmu ve lo Bangladesh club Abhani Dhaka chu 2-0 in an ngam lo. Bangalore club hian Group E-ah erawh hma an hruai chhunzawm tho a, an hnuai chiaha awm Maziya nen point kua ve ve an hmu.

AFC Cup ngaihthahtu Bagan

Mohun Bagan-in AFC Cup aiin Federation Cup an ngai pawimawh zawk a, Maldives-a zin zingah captain Yusa Katsumi leh Jeje Lalpekhlua chiah player langsar awmin coach Sanjoy Sen chu zin zingah pawh a tel lo!

Bagan-in AFC Cup an ngaih pawimawh loh rah minute 45 chhungin an seng nghal a, Yasfaadh Habeeb, Mohamed Umair leh Aleksandar Rakic-ten Maziya tan goal khat ṭheuh khungin chawlhlawk hman a nih meuh chuan chak tur zawk a chiang tawh.

Second half ṭan tirah Kingshuk Debnath chuan Bagan si phurh sut ṭhen mah se Assadhulla Abdulla penalty leh Rakic goal hmangin Maziya-in an chhanglet lehnghal a, minute 78-naa penalty aṭanga Mizo tlangval Jeje Lalpekhlua goal khungin awmzia a nei tawh lo.

Asia ngamtu Jeje

Mohun Bagan-in Maldives-ah hnehna chang zo lo mah se Jeje Lalpekhlua'n tun inelnaa a goal lina a khung a, Hnahthial tlangval tan Asia huap club inelnaa a goal 11-na a ni.

Jeje hian nikum khan goal sarih ngawt khungin Indian player zinga Asia club inelnaa season khata goal khung hnem ber a lo ni tawh.

Indian player zingah Bhaichung Bhutia chuan Asia huap club inelnaah goal khung hnem berin East Bengal, JCT leh Mohun Bagan tan goal 14 ngawt a khung a, pahnihna Mohun Bagan legend Sisir Ghosh chuan goal 13 a khung bawk. Player pahnih an chawl tawh a, goal khung hnem pathumna Sunil Chhetri-a'n Churchill Brothers leh Bengaluru tan goal 11 a khung tawh - India captain hi Jeje chuan a nihrual ve ta chiah a ni.

Bengaluru an tlawm

Aizawl FC laka I League nomawi an hloh hnuah Bengaluru-in AFC Cup chawi ngei tum mah se Abahani khelmualah an beisei loh result an hmu a, 2-0 in an tlawm. Minute 80-naah Abahani defender Nasiruddin Chowdhury chu a yellow card pahnihna avangin hnawhchhuah a ni a, hetihlai hian team pahnihin goal an la khung lo.

Bengaluru-in players tam zawk an nih an chhawr thei lo a, Abahani-in goal an khung. Minute 87-naah counter attack hmangin Saad Uddin chuan goal hmahruai a khung a, hun pek belhah Bengaluru goalkeeper Amrinder Singh chetsual nangchingin Rubel Miya chuan an goal hnihna a khung leh bawk. Hun a tawp zui a, Bengaluru an tlawm.

Bangladesh-ah Blues tan Daniel Lalhlimpuia leh Malsawmzuala bakah hun rei tak a inhliam hnua lo kir leh Lalthuammawia Ralte te chu zin zingah an tel a, Minute 46-naah Daniel-a tlanluhtir niin Sawmtea leh Thuama erawh bench lamah hun an hmang tluan thung.

Team Dinhmun - Group E
Team Pld W D L GF GA GD Pts
Bengaluru 4 3 0 1 5 3 2 9
Maziya 4 3 0 1 8 3 5 9
Mohun Bagan 4 1 0 3 6 9 -3 3
Abahani 4 1 0 3 3 7 -4 3