Kolkata tan Supergiant an lian

Rising Pune Supergiant-in Kolkata Knight Riders lakah mi­khual tlangnel zia an chhuah a, Ni­lai­ni zan khan wicket liin an hneh.

Eden Gardens, Kolkata-a in­khelah player langsar ber chu Rahul Tripathi a ni a, Pune batsman hian run 93 ngawt siamin a team tan a che ṭha hle.

Mualneitu Kolkata an bat hma­sa zawk a, over 20-ah run 155 siamin wicket riat an hloh. KKR tan opener Sunil Narine chu run pawh siam loin a out nghal a, run siam hnem ber Colin de Grandhomme pawhin run 36 bak a tlin lo.

Rising Pune bat hun a thleng a, opener Ajinkya Rahane-a'n run 11 bak a siam hman lo tiha a out nghal avangin KKR an phur hle. Mahse, rin loh lam aṭangin Rahul Tripathi a inlar a, kum 26 leka upa batsman hian ball 52 lek a hmachhawnah run 93 siamin a team a chhanhim.

Pune hian over 19.2-ah an target hi an umpha a, wicket ruk an hloh.

Zanin Inkhel Tur
Royal Challengers Bangalore 08:00 PM Kings XI Punjab