Cleveland leh Spurs an chak
NBA conference playoff semifinal khelh mekah nimin zing khan Cleveland Cavaliers leh San Antonio Spurs te chuan hnehna an chang.
Cleveland Cavaliers hian Toronto Raptors 125-103 in an hneh a, best of seven series-ah 2-0 in hma an hruai. Inrinni zing dar 4:30 khian Air Canada Centre-ah Game 3 khelh a ni ang.
NBA champion tan hian LeBron James chuan point 39 a score a, nikum NBA Finals Most valuable Player bakah hian Kyrie Irving chuan point 22 a score bakah assist vawi 11 a nei bawk - point 18 score tu Channing Frye sawi hmaih theih a ni lo bawk.
Kum 2015 aṭang khan Quicken Loans Arena bikah Cavs hian Raptors hi an ngam hle a, vawi 18 an hmachhawn tawhah ṭum khat chiah chak loh an nei.
Cavs coach Tyronn Lue chuan, "Kan basket venhim kawngah hmasawnna tur tlem ka la nei tih mai loh chun ka nauten an khel ṭha hle. Kan nomawi humhim turin kawng thui tak zawh tur kan la nei a, a pawimawh hmasa chu Game 3-a hnehna chan leh phawt a ni," tiin a sawi.
Inkhel pakhat zawkah San Antonio Spurs chuan an match hmasa zawka an ngam loh Houston Rockets chu 121-96 in an hneh let a, series-ah 1-1 chiah a ni. Inrinni zing dar 7:00-ah Game 3 an khel ve leh dawn a ni.