Europa League Ajax-in final an hnaih

Kum 21 hnua a vawi khat nana Europe-a final lut turin Ajax dinhmun a ṭha hle. Dutch club hian Nilaini zan khan Europa League semifinal first leg-ah an mikhual Lyon chu 4-1 in an sawp a, pen khatin final an rap tawh.

Ajax tan inkhel ṭan aṭanga minute 25-na lekah striker Bertrand Traore chuan goal hmahruai a khung a, Chelsea aṭanga loan-a Dutch club zawmtu hian minute 71-naah a goal hnihna a khung bawk.

Johan Cruyff Arena-a inkhelah hian Ajax tan Kasper Dolberg leh Amin Younes chuan goal khat ve ve an khung bawk a, French club tana Mathieu Valbuena goal khung chu mualpho zualpui tur khuhna chauh a ni tawh.

Ajax hian Europe-a final an luh hnuhnung ber chu kum 1996 daih khan a ni tawh a, European Cup final-ah Juventus an ngam lo.