Harsa takin Rafael Nadal a chak

Rafael Nadal chuan Wimbledon semifinal a in vaw kai. Spanish star hian zaninah Nick Kyrgios a hmachhawn leh dawn, final luh inchuha player ṭha pahnih inhmachhawn tur hi a hmuhnawm ang.

Darkar li leh minute 21 an inkhelh hnuah Nadal hian Taylor Fritz chu 3-6, 7-5, 3-6, 7-5, 7-6(4) in a hneh a, inkhel dangah Kyrgios chuan Cristian Garin lakah 6-4, 6-3, 7-6 (7-5) in hnehna a lo chang ve bawk a ni.

Harsatna karah
Nadal-a'n kumin chhungin Grand Slam nomawi pali kawl khawm vek a tum a, kawng hautak a zawk mekah hian harsatna karah pawh nghet takin a kal zel. A match hmasa lama a pum nuam lo a chhuak nawn, set hnihna an khelh zawhin enkawl lailawk a ngai hial.

Seeded 11-na Fritz a ṭang thei viau a, set hnih ve ve an lak hnuah set ngana hmangin chak zawk zawn a ngai. Set hnuhnung berah pawh service an hum thei viau, 3-3 a nih hnuah Nadal-a'n a khingpui service chhuhsakin 4-3 in hma a hruai.

Nadal hian a service vawi hnih hum zui se a chak tlang mai tur a ni. Mahse, a break sak hnu chiahah a service a hloh ve zui a, 6-6 ni chhunzawm lehin tie break an khelh a ngai. Tie break-ah erawh Nadal hi 5-0 in a sang nghal a, point hloh nei ve bawk mah se a hawi kir lo.

Seeded pahnihna Nadal chuan, "Ka pum a nawm loh deuh avangin service dan tihdanglam a ngai a, a nihna takah chuan kan inkhelh lai khan engtin nge match ka khelh zawh hram theih ang tih chu ka ngaihtuah ber a ni, ṭha taka a hmawr ka bawk thei hi ka lawm," a ti.

Nadal hian kuminah Australian Open leh French Open nomawi a chawi tawh. Wimbledon leh US Open title a la leh thei a nih chuan, kum 1969 hnu lamah Rod Laver anga Grand Slam title pali kum khata la vek thei hmasa a ni ang.

Beiseina nen
Pum nuam lo vangin buai mah se Nadal a zam lo, semifinal an khelh hunah chuan harsatna nei loa a inkhelh theih ngei a beisei. Tennis tournament upa ber a khelh lai aṭanga inhnuhdawh mai chu a la tum lo hle.

Kum 36 mi Nadal chuan, "Inkhel tura ka inpeih ngei ka ring. Nick hi player ṭha a ni a, hard court, clay leh grass-ah a khel thei vek. A bik takin grass court hi a ṭhat zualna a ni a, kumin hi a khelh ṭhat lai a nih bawk avangin theihtawp ka chhuah a ngai dawn," a ti.

Player pahnih hi Wimbledon bikah chuan vawi hnih an lo inhmachhawn tawh. 2014 kha Kyrgios-a'n grass court inelna lian a khelh hmasak a ni a, fourth round-ah Nadal a hneh, an intawn hnuhnung zawkah erawh Nadal a chak thung.

An inkhelh hnuhnungah hian Nadal-a'n hmanhmawh lo taka hun a hmang vel chu Kyrgios hian a ngaithei lo, umpire hnenah a sawisel fo. Tournament danga an intawnnaah pawh Australian star hian service danglam leh thil dang hmangin Nadal a chhaih fo.

Boruak an lo neih fo tawh avangin zanina an inkhel tur hian ngaihven a hlawh dawn. Kyrgios hian theihna a nei sang a, a khelh fuh ni chuan player ṭha dang pawh hneh thei turin theihna a nei - Nadal kaltluang lai dan ngei a tum ruh khawp ang.