TKS zinkawng a tawp

Mizoram Super League team hlun leh ṭha berte zinga mi Tuikual South tan MSL 7 a tawp. Phengphehlep hian chak ngei ngei ngaihna inkhelah Mission Veng Hotshots chu 92-83 in an ngam lo a, tun season atan an zinkawng a tawp zui nghal.

Nizan khan Hotshots leh Khatla TBL ten Play In an khel zui. TBL hi an chak a nih chuan Zarkawt BC hmachhawn turin an tlang nghal ang. Hotshots an chak a nih erawh chuan vawi khat an inhmachhawn nawn leh thung ang.

Nilaini zan R. Dengṭhuama Indoor Stadium, Mualpuia inkhelah Tuikual South lam dinhmun a ṭha hman viau, quarter hmasa pathum an khelh zawh pawhin 73-66 in hma an la hruai thei a, minute 10 chhung ṭang tluan zeuh thei se tlang mai tur an ni.

Mahse, Hotshots lamin thil tum dang an la nei ve tho. Quarter hnuhnung ber bikah MSV hian point 29 zet an neih belh a, TKS lamin point 10 bak an neih belh thei lo. Hun rei tak chhung chungnung zawk kha a tawpah chuan chak lo zawkah an ṭang.

Tuikual South hian MSL season hmasa ber aṭang khan an la khel kim vek, team ṭha leh rinkai pawh an ni ṭhin. Amaherawhchu, hun pawimawh laiah an vanduai ṭhin a, tualchhung basketball inelna sang berah hian an la champion thei lo, season thar an nghah leh rih a ngai dawn.

Hotshots erawh MSL an khelh vawi khatna a ni, a chhe berah pathumna tal chu an ni dawn. Play In kalphungah final lut tur erawh chuan TBL an hneh nawn a ngai dawn, tun hnaiah match an khelh hnem avangin final luh chu thil awlsam a ni lo ang.