Juve-ah Pogba a kir dawn

Paul Pogba chuan tun hma lama a khelh tawhna Juventus a pan leh dawn, tunkar tawp hian Old Lady pan tur hian medical test a nei ang, chumi hnuah contract a ziak dawn a ni.

Kum 29 mi Pogba hian Manchester United tana a contract a hmang zo, a pawh sei loh avangin a duh zawng club a zawm thei dawn. Turin club tan hian tun hmain hlawhtling takin a lo khel tawh, a ropuina hmasa ang neih leh a tum ang.

France international hian 2016 khan Juve aṭangin Man United hi a zawm, pound makatduai 89 man zet niin a hunlai chuan khawvela player man to ber a ni hial. Beiseina sang tak nen Man United pan mah se, a duh leh beisei ang hlawhtlinna erawh a chang ta lo.

Ruahman dan chuan Pogba hian kar leh aṭangin Juve training a zawm dawn. United States lamah Barcelona leh Real Madrid a hmachhawn hman a rinawm, season thar atana inbuatsaihna ṭha tak a ni ngei ang.

Italian club ṭha hian season kua zet Serie A nomawi an chawi thei a, chumi hnuah Inter Milan lakah nomawi an hloh - season hmasa khan AC Milan kutah league nomawi a lut bawk; Old Lady tan insiamṭhat a ngai hle.

Juve tan Pogba hi ṭhatpui tham a ni dawn, chutih rualin tun hma lama hlawhtling taka an lo chhawr tawh midfielder kha a la ni reng em ,tih erawh hunin a hril ang.