Milian ngamtu Vaivakawn; Republic an chak

India rama footballer man to ber Lalengmawia (Apuia) awmna Vaivakawnin anni aia lian an hmu lo - penalty hmanga Chhinga Veng an petchhuah hnuah penalty hmang vekin Bethlehem Vengthlang LC an hneh ve leh ta.

LBS Suzuki All Mizoram Inter Village Football Tournament a ngaihnawm tawlh tawlh a, Vaivakawn leh BVT te goal khung loa an inhnehtawk hnuin, penalty-ah 3-2 in Vaivakawn an chak a, round of 16 an lut der.

Champhai Zotlang lakah penalty hmanga an chak hram hnuin Republic Veng LC an insiamṭha a, team ṭha Zemabawk LC chu 2-0 a hnehin last 16 an lut ve bawk - last 16-ah 2-1 a Ṭumpui, Kolasib hnehtu Lungdai nen an intawng ang.

Nimin inkhel ngaihven hlawh dangah Salem Veng leh Hnahthial Jt VC te pawh an chak a, Salem hian Venghlui an petchhuah laiin Hnahthial hian Tanhril LC chu an sawp thung.

Vaivakawn chu
Lalengmawia'n captain armband hreng chungin Vaivakawn ho thei mah se team dang enin team ṭha taka chhal ngam an harsa a, mahse, coach tawnhriat nei ṭha Lalruatliana Sailo (Tawia) kaihhruai an nih miau avangin Vaivakawn tawh an khirh.

Vaivakawn tan an thiampuipa Apuia bakah, Indian football-ah pawh keeper hmabak nei êng ber pawl ni phak Lalbiakhlua Jongte te an inlan thei a, BVT-in an thiampuipa K. Lalṭhathanga (Puitea) chu hliam vangin bul an ṭantir thei lo - a tawpah penalty hmangin Vaivakawn an vannei.

Apuia chuan, "Kan vanneih vang a ni ber a, chutih rual chuan chak hi chu kan beisei sa ang chu a ni ve tho. Kan team kan la nau deuh a, tawnhriat kan la nei tam tawk lo a, enge kan an zel dawn sawi thiam a harsa. Kan player pawimawh Swapna Jeevan a inhliam a, kan tuar viau thei bawk," tiin Vanglaini a hrilh.

Vaivakawnin last 16 an luh theih nana keeper pawimawh Biaka chuan, "A tirah chuan kan beisei a sang lem lo. Mahse, team game ṭha tak kan khel a, Apuia a awm bakah coach kan nei ṭha bawk. Pathian zarah champion tura rin team pahnih kan hneh tawh a, beiseina a sang ve zel," tiin champion an tum thu Vanglaini a hrilh.

Republic an chak
Republic Vengin an match hmasa pahnihah goal khung an thiam tih an pholang a, goal 28 ngawt an khung - mahse, an match thumnaah Champhai Zotlangin minute 90 an chelh tluan thei a, penalty hmangin an chak hram.

Zemabawk lakah pawh Republic-in bul an ṭan ṭha tawk lo a, Zemabawk North hneh hlim Zemabawkin eng ruai an ang bik lo - chawlhlawk hma team pahnih khelh dan hi nung tak anga sawi a harsa a, a hmuhnawm tawk lo.

Second half-ah erawh Republic an insiamṭha a, Mizoram striker ṭha F. Lalrinpuia'n minute 60-naah goal rawn khungin Lalnunzira'n a belhchhah ve leh a, Zemabawkin a chhanletna tur an neih loh avangin derby-a an chak avanga an phur vanglai takin an tla.

Lengpuia inkhel ngaihven hlawh dangah Sialhawk Express R. Laldan-mawia'n Sialhawk tan goal hnih a khung leh ta a, Crespo Vanlalhriatpuia goal khung nen Kawnpui Venglai chu 3-0 in an hneh.

Mangṭha Ṭumpui
Aizawl khaw pawn aṭanga team rawn tel zingah Ṭumpui, Kolasib chungah beiseina a sang a, mahse, William Lalnunfela leh Ramhlunchhunga telna team hian Lungdai chu 2-1 a hneh loin an tla.

Lungdai hian minute thumna lekah, MPL U18 top scorer Lalbiakmuana hmangin goal hmahruai an khung a, Ṭumpui an hawihai - Kolasib team hian na takin nawr let mah se Lungdai lamin an nawr let thut a, Paul Ramengmawia chuan kawh zetin an goal hnihna a khung.

Team ṭha zawk Ṭumpui tan Ramhlun-chhunga'n minute 88-naah a khung ve leh a, mahse, Aizawl FC forward-in goal a khung hian a tlai hret tawh a, Ṭumpui an tho hman tawh lo.

Hetihlai hian champion beiseina nei ngam khawpa team ṭha Hnahthial Jt. VC -in Tanhril laka hnehna chang turin harsatna an tawk lo a, Jakob Vanlalhlimpuia, Lalrempuia leh Lalramtiama Fanai goal hmangin 3-0 in an chak.

Inkhel dang
Mamit Jt. VC-in sang tak thlen an tum tih an pholang a, West Phaileng chu 4-0 ngawtin an sawp. Inelna ṭantirha sawi hlawh ni lem lo Farkawn an tlangnel tawlh tawlh a, Thitlang chu 3-2 in an hneh.

MFA ground-a inkhelah hian Farkawn tan K. Lalrinpuia chuan hattrick a siam a, a team a chakpui. Selingin Sihphir lakah 4-0 zetin hma an hruai hman a, Sihphir hian goal hnih rawn khungin 'comeback' beiseina an nei hman.

Mahse, Seling lamin goal khat dang an khung belh a, India tana age level hrang hranga lo inlan tawh Isac Zomuanpuia goal khungin Sihphir beiseina a siam zo tawh lo a, 5-3 in an tlawm.

Champion tura rinkai Lengpui an la ṭha reng a, Sihphir Venghlun chu 2-0 in an hneh a, Champhai Kananin mang ram aṭanga Thakthing kai harhin 5-0 ngawtin an sawp bawk.