Thenzawl West an la dam

Indian Super League player pathum leh I League player pathum awmna Durtlang an hneh a, chumi hnuah College Veng an hneh leh. Thenzawl West VC hian nimin khan Lalthlamuanpuia goal khat hmangin Saron Veng LC 1-0 in an hneh leh bawk a ni.

Jeje Lalpekhlua enkawl Durtlang an hneh khan an vanneih vang nia ngai an tam, inkhelh banah Thenzawl player ten ISL player an ngaihsante thla an lakpui pawh a darh nasa, thil mak a ni hran lem lo.

Team ṭha zinga mi College Veng an hneh leh sak a, tih fuh satliah a ni lo tih a lang. Saron Veng an hneh a, an veng ṭhenawm Tuithiang nen vawiin chawhnu dar 2:00 hian an innuai leh dawn, a veng indawtin an hneh thei em, tih chu en a châkawm hle.

Tuithiang hi dah hniam a remchang dawn bik lo, nimin khan Bilkhawthlir North VC chu 5-1 tehmeuhin an la hneh thei. A ni zawnin match an khelh a ngai a, tu player nge fit ṭha leh insiksawi kual thiam tih kan hmu dawn.