Goal sarih khung thei Bawngkawn

Tun hma aṭangin player an nei ṭha ṭhin a, champion tak erawh an la harsat deuh - Bawngkawn tan kumin hi an champion kum a ni ve tawh mai thei. Nimin khan Bawngkawn hian Hlimen 7-0 in an sawp a, vawiin chhun dar 12:00 hian Ramhlun North an hmachhawn leh nghal ang.

Mizoram striker ṭha MS Dawngliana, H. Lalmuankima, Ronald Zothanzama, Lalnuntluanga, Immanuel HS Lalṭhazuala, KC Larchhuakmawia leh David Lalbiakzara te awmna team an ni a, mahse chawlhlawk hmain goal an khung thei bik lo.

Mahse, Bawngkawn hian an sa huai an la ser zo lo. Isak Vanlalruatfela a rawn lut a, inkhel boruak a danglam vek. Indian Super League club Odisha forward hian inkhel kalphung a thlang danglam hlawk a, minute 45 chhungin goal sarih tehmeuh an khung.

Striker Dawngtea'n goal li a khung a, forward Isak Vanlalruatfela chuan hattrick a siam bawk. Anni pahnih hi Ramhlun North tan pawh ven ngun ngai bik an ni dawn a, minute 90 chhung dan beh erawh a awlsam lo mai thei.

Ramhlun Derby a hnehna changtu Ramhlun North an la kal zel a, Ramhlun Venglai an hneh kha an tih fuh palh a ni lo tih lantir nan nimin khan Falkawn an hneh nawn leh sak.

Bawngkawn lamin goal an khung theih avangin Ramhlun North hi an zam ngawt bik lo ang. Falkawn laka hattrick siamtu PC Lalhruaisanga an kawl ve tho a, goal hmaah an hlauhawm ve dawn, Bawngkawn tlarhnung tan ani hi ven uluk a finthlak ang.

Vawiina an hmachhawn tur erawh Bawngkawn an ni tawh dawn, thil a awlsam lo mai thei. Team pahnih hian niminah match an nei ve ve, zan khat chauh hahchawlhna hun an nei tihna a ni, player ṭha hman thiam bakah insiksawi thiam a pawimawhin a rinawm.