Armed Veng Derby hmain match khat

LBS Suzuki Inter Village Football Tournament khelh laiah Armed Venbg Derby kan hmu ngei dawn niin a lang, chumi hma chuan Armed Veng leh Armed Veng South ten an khingpui ve ve an hneh leh phawt a la ngai thung, an chak chuan last 16-ah an intawng dawn.

Lalbiaksanga enkawl Armed Veng hian vawiin chawhma dar 10:00 hian RG Stadium, Mualpuiah Bungkawn an hmachhawn dawn. An match hmasa lamah Keifang Jt. VC leh Kanan te an hneh thei a, match hmasa lam nena khaikhin chuan tun ṭuma an hmachhawn tur hi an huphurh lo ang.

Armed Veng coach Bsa chuan, "Team tam tak inel kan ni a, kan inthlifim chho zel. A level a san tawh avangin tumah inzuam ngawt chi a ni lo. Bungkawn pawh fimkhur takin kan hmachhawn a ngai dawn a, a tirah chuan kan ṭhat dan berin kan khel ang.

"Ka naute an dam kim a, an fitness a ṭha bawk. Chutih rualin match kan khel hnem a, kan vannei a nih chuan khelh hmabak kan ngaihtuah tel a ngai, chumi atan chuan insiksawi dan pawh kan ngaihtuah tel dawn," tiin Vanglaini a hrilh.

Armed Veng hian ṭantu an ngahin ṭhin. Kanan an hmachhawn ṭum pawhin zing dar 8:00-ah khelmual sir mawi hmawk tham fans an kalkhawm thei, vawiinah pawh mual sira kawr eng (yellow) ha ṭhahnem kan kan hmu a nih pawhin a mak lo ang.

Armed Veng South pawh vawiinah an inlan dawn, zing dar 8:00-ah Khawlailung an hmachhawn ang. Chaltlang lakah 3-2 a chak hlim an ni a, captain C. Ramdinmawia hoa khel hi Lenchim hnehtu Khawlailung lakah rinkai zawk an ni.