Raheem Sterling-a'n Chelsea nen inremna an nei

Manchester City legend Raheem Sterling chuan Chelsea zawm a remti a, London club nen hian mimal thilah an inrem tawh - thutlukna chu City kutah a innghat ta.

Kum 27 mi Sterling hian City-ah kum khat cham turin contract a la nei a, mahse, hmun a chan tam tawk loh avangin Manchester khaw club chhuahsan hi a pawi ti lo.

English forward hi Barcelona, Real Madrid leh Bayern Munich te pawhin lakluh an duh a, mahse, Sterling hian amah duh bertua a ngaih Chelsea lam pan a thlang ta zawk.

He thuziak i chhiar meuh chuan Sterling hian Chelsea hi a zawm fel tawh hial mai thei - London club hian a manah pound maktaduai 45 an inseng dawn niin an sawi.

Phal lo chungin
City chuan Sterling hi la chhuak rih lo turin an duh - mahse, English forward hian club-ah hmun pawimawh chan a duh a, Pep Guardiola-a'n duhthlan tur a ngah avangin a duh anga tam match a khel thei lo.

Kum 27 mi a nih tawh bawk avangin Sterling hian a career-a a hun tawn pawimawh lai ber a tawng chhoah a inngai a, a tana ṭha tur bera thutlukna siam a duh - a tawpah City chhuahsan a thlang.

Barca, Real leh Bayern pawhin lakluh duh mah se, Chelsea-in mipui hriata an duh thu an puan dan te, private-a an indawr dan chenin Blues-in Sterling lung an len ber a, Thomas Tuchel-a hnuaia khelh a thlang ta.

Sterling hian City-ah hlawhtlinna tam tak chhar mah se hlawhtlin lehzual a duh a, team mai ni lo, mimal anga hming chher lehzual a duh a, Ballon D'Or thlengin a mitthla - a beisei zawng zawng a hlawhtlin theih nan chuan regular taka khelh theihna tur club ṭha tho zawm hi a tan thutlukna fing a ni.

Sulhnu ropui
Sterling hian kum 2015 khan Liverpool aṭangin City hi a zawm a, Manchester khaw club hian pound maktaduai 49 ngawtin an lei chhuak - a hunlai nena ngaihtuah phei chuan Sterling man hi tam tak a ni.

Mahse, English forward hian a man a khel chhuak chiang hle. City tan match 339 inlanin goal 131 a khung a, assist vawi 95 a nei. Hei mai a ni lo - Premier League (4), FA Cup (1), League Cup (4) leh Community Shield-ah te champion nomawi a chawipui vek!

Sir Alex Ferguson hunlaia Manchester United player ṭhenkhat tih lohah chuan Sterling hian Premier League champion hnem lamah John Terry (5) leh City tana a khelhpui ṭhin Fernandinho (5) chiah a tluk lo.

Kum 2016-a Pep-a'n City a enkawl hnuah Sterling hian goal 120 ngawt a khung a, Pep-a hnuaia City tana goal khung hnem lamah pawh Sergio Aguero (124 goals) chiah a tluk lo.

Fak hlawh lo val
Sterling hian season hman zawh takah khan inelna hrang hrangah match 47 khel mah se heng zinga match 32-ah chauh bul a ṭan - a bul ṭanah pawh vawi riat lakchhuah a ni a, a duh angin a inkhel lo.

Heti chung hian goal 17 zet khungin assist vawi kua a la nei cheu a, season liam taa an league match tawp bera Aston Villa an hmachhawn ṭum pawhin bench-ah dah ni mah se, khelmual a luh hnuah danglamna a thlen a, 2-0 a an hnufual laia City an 'comeback' theih nana Ilkay Gundogan goal khung tur chu a siamsak a ni.

Sterling hian hmun pawimawh chan chang nei mah se, Real Madrid nen Champions League semifinal match pawimawh an khelh pahniha bench-a luahlumte chu a theihnghilh bik lo a, Jack Grealish awm hnuah hmun a chang tlem sawt tih a hai lo bawk.

Hetiang a nih lai hian City hian European football-a striker 'hot' ber pawla chhal ngam Erling Haaland leh Argentine player ṭhangduang Julian Alvarez an neih belh a, City-in chelh duh mah se Sterling hian a inkhel tam tawk dawn lo tih a hai lo.

Chelsea tan lawmna
Todd Boehly leh a thawhpuiten Chelsea an lei hnuah player langsar lakluh an la nei lo a, Sterling hi an player langsar lakluh hmasak ber a ni dawn - English football-a tlangnel sa a nihna hi Blues tan chuan a ngaihṭhatthlak.

Chu chauh a ni lo. Chelsea hian season hman zawh takah khan goal khung an harsat hle - goal khung hnem ber pawh Romelu Lukaku a ni a, Belgian striker hian inelna hrang hrangah goal 15 a khung.

Pound maktaduai 97.5 man striker sulhnu atan chuan a ropui lo hret tih a chiang a, a club hlui Inter Milan lamah loan-in a kir leh tawh. Lukaku dawtah hian Kai Havertz (14) leh Mason Mount (13) te chu Blues tan season hman zawh taka goal khung hnem an ni.

Heng zawng zawng ngaihtuah chuan Chelsea hian goal khung thei forward an mamawh a, Sterling hian an mamawh chhanna ni turin theihna a nei - chu chu a sulhnuin min hrilh a, a la chawi ngai loh Champions League nomawi pawh Blues tan ngei a chawi lo ang, tih tu nge sawi thei? Chelsea fan-ten beiseinain an thlir e.