Women's Euro 2022 Inelna thlengtu England an chak

UEFA Women’s European Championship 2022 chu Nilaini zan khan khelh ṭan a ni ta a, inelna thlengtu England chuan an match hmasa berah Austria chu 1-0 in an hneh.

England hmeichhe team tan Beth Mead chuan minute 16-naah goal hmahruai a khung a, hun tawp thlengin Austria-in a chhanletna tur an nei lo.

Arsenal winger Mead hian Chelsea forward Fran Kirby siamsak chu a awmin a la thla a, Arsenal tana a khelhpui, Austria keeper Manuela Zinsberger man theih loh turin a pet goal - goal hi offside-a ngaiin video assistant referee hmangin ennawn a ni a, a tawpah pawm a ni.

Old Trafford-a inkhel hi mipui 68,871-in a hmunah an en a, European Women's Championship-ah heti zata tam mipuiin inkhel an la en ngai lo - record thar a ni.

Europe-a hmeichhe footballer-te tana ram leh ram inelna sang berah hian ram 16-in inelna an hmachhawn a, group paliah (A-D) ṭhen hran niin, group khatah team pali zel an awm.

Group tina a sang pahnihin knockout round an lut dawn a, hei hi quarterfinal a ni nghal dawn a ni. Nizan khan Norway leh Northern Ireland te an inkhel ve leh a, he thu buatsaih a nih lai hian result kan hre hman lo.