Barca-in De Jong an zuar lo

Barcelona-in mid-fielder Frenkie de Jong chungchangah mipui barakhaihtu chanchin thar an nei a, Dutch midfielder chu zawrh lai a nih loh thu an sawi.

Catlan club hian De Jong duhtu Manchester United nen a thuphungin inremna an nei tawh a, pound maktaduai 56 pek phawt a, a khelh ṭhat dan a zira pek belh turin an inbe tawh.

Mahse, Barca president Joan Laporta chuan, "De Jong hi Barca player a ni a, hralh mamawhna leh duhna kan nei a nih loh chuan hralh kan duh lo," a ti.

De Jong hian kum 2019 khan Ajax aṭangin Barca hi pound maktaduai 65-in a zawm a, a khelh ṭhat dan a zira £9.5mtd-a sang chho thei tur niin, kum nga atan contract a ziak.

Dutch midfielder hian United a pan a nih chuan Ajax-a a pu hlui Erik ten Hag nen an thawkdun leh thei dawn tihna a ni a, mahse, Barca thu leh hla a dang leh tlat.

Laporta chuan, "De Jong hian sawmtu a nei tih chu kan hria. Hralh kan duh ta a nih chuan kan ngaihtuah ang, mahse, tun dinhmunah chuan hralh tumna kan nei lo," a ti.

Spanish chanchinbu lar Marca tarlan danin, De Jong hian 2020-21 leh season hmasa khan Covid-19 vangin a hlawh a tihniam a, euro maktaduai thum leh €6mtd a hlawh a, tun season aṭangin €18mtd hlawh ṭan tur a ni.

Barca a chhuahsan chuan season hnih liam taa a hlawh tihhniamna, zângnadawmna sum dawn a duh dawn niin an sawi a, Barca hian sum seng ṭeuha chhuahtir ai chuan chelh rih an duh leh zawk pawh a ni mai thei.