Fulham-in Pereira an lalut dawn

Premier League kai thar Fulham chuan Manchester United aṭanga midfielder Andreas Pereira lalut turin Red Devils chu inremna an neihpui a, kum 26 mi manah hian pound maktaduai 10 an inseng dawn - a khelh ṭhat dan a zirin a man hi la pung leh thei tur a ni.

Brazilian midfielder hian Cottagers (Fulham sawina) tan kum thum chhung khel turin contract a ziak dawn a, he thuziak i chhiar meuh chuan an in lalut fel tawh hial ang.

Manchester United aṭanga a professional zinkawng ṭantu Pereira hi player thiam pangngai tak ni mah se beisei angin United-ah hmun a chang thei lo a, kum 2021 leh 2022 kha Brazilian club Flamengo-ah loan-in hun a hmang.

Brazil-a a inkhelh hma hian Granada, Valencia leh Lazio-ah te pawh loan-in a lo chhuak tawh bawk a, Red Devils-a a awm chhungin match 74-ah chiah inlanin goal li a khungsak a, assist vawi nga neiin, nomawi erawh a chawi lo.

Season hman zawh takah khan Flamengo tan match 29 khelin goal thum a khung a, assist vawi hnih a nei. Pereira hian Copa Libertadores final-ah Flamengo hi hruai thleng mah se, 2-1 a Palmeiras an ngam lohna inkhela an goal hnihna hi a tihsual vanga lut a ni.

Flamengo hian Pereira hi a loan hun a zawh khan an duh chuan an lalut thei a, The Athletic chuan February khan euro maktaduai 10.5-a Brazilian club hian a ngheta an lakluh tur thu thlengin an tarlang hman. Mahse, a tawpah Brazilian club an inhnukdawk a, Fulham lawmah a tla.

Fulham hian Portugal defensive midfielder Joao Palhinha chu Sporting Lisbon aṭangin £17mtd-in an lalut tawh bawk a, kum nga chhung atan contract an ziahpui.

Kum 26 mi Palhinha hian Sporting Lisbon aṭanga a career ṭanin, loan-in Moreirense, Belenenses leh Braga-ah te a khel tawh tih loh chu a nghetin club dang a la zawm ngai lo.

Sporting tan hian inelna hrang hrangah match 94 khelin goal sarih a khung a, Primeira Liga (1), Taca da Liga (2) leh Supertaca Cândido de Oliveira-ah te a champion pui a, 2020-21 season-ah khan Primeira Liga team of the year-ah a lang bawk.

Portugal tan vawi 14 inlanin goal hnih a khung a, Fulham tan ani ang player lakluh theih hi thil lawmawm a tling.