Final-ah Mizoram an vanduai

Nimina National Junior Football Championships final khelhah Mizoram leh Punjab hun pangngaiah goal awm loin an inhnehtawk a, extra time-ah Punjab 3-0 in an chak.

BC Roy Trophy final hnuhnung pathumah Mizoramin final an lut vek a, amaherawhchu kum zawna Punjab an hneh loh avangin National Junior Football C'ship-a Mizoram nomawi chawi zat chu vawi khat chauh a la ni.

A lum a ni
Pant Stadium, Bhilai, Chhattisgarh hi tlai lama inkhel ni mah se 42 degree celsius te a la nih avangin chauhna tham a tling.

Hun pangngaiah team pahnih an inhnehtawk a, extra time first half-ah khaw lum hnuaia khel thei zawk Punjab-in goal an khung. Mizoramin siphurh sut tuma an nawr let an tuar a, second half-ah goal hnih dang an chuah leh phah bawk.

Theihtawp a tawk lo
Mizoram manager Hmingthansanga chuan, "Theihtawp kan chhuah a, kan theihtawp chhuahin trophy a hlawh chhuak zo lo hi a pawi ka ti . Mizo mipui min beiseina kan tihlawhtling thei lo a, ngaihdam kan dil a ni," tiin Vanglaini a hrilh.

Kum 2013-a Mizoram champion puitu manager Hmingsanga chuan khaw lum chu an chak lohna chhan ni bera a hriat thu a sawi tel bawk.

Mizoram zin kawng
Group Stage
April 26, Nilaini
Mizoram 5 - 0 Uttarakhand
MIZ : Lalṭhapuia 22', 69'; Lalthanmawia 43'; Zakaria Lalhriatpuia 57'; Lalhruaitluanga 83'
April 28, Zirtawpni
Delhi 0 - 2 Mizoram
MIZ : Lalruatfela 43'; Lalremmawia 83'
April 30, Pathianni
Mizoram 2 - 1 Jharkhand
MIZ : Lalruatpuia 32'; Lalremmawia 56'
Semifinal
Mizoram 2 - 0 West Bengal
MIZ : Lalremmawia 39'; Lalruatpuia 49'
Final
Mizoram 0 - 3 (a.e.t) Punjab