Arsenal hmachhawn tur United ; Chak duh Wenger vs Indahṭhat duh Mourinho
Arsenal chuan Emirates Stadium-ah Pathianni zan dar 8:30 hian Manchester United an mikhual dawn. Jose Mourinho chuan tun hnaia player a chhawr rim ṭhenkhat an inlan loh tur thu a sawi chhuak.
Manchester United manager Mourinho hian Premier League table-a a sang pali zinga tel chunga Champions League khelh tum ai chuan Europa League nomawi chawi chunga Europe club liante inelna sang ber khelh a thlan zawk thu a lo sawi tawh.
Manager pahnih thusawi a in ang lo, Arsenal manager Arsene Wenger erawhin hnehna chan ngei an tum thu a sawi a, league khelh hmabaka chak vek chu an tih theih awmchhun a nih thu a sawi.
Arsenal leh Manchester United te hi inelna hrang hrangah vawi 224 an inhmachhawn tawh, United hian record nei ṭha zawkin vawi 94 hnehna an chang; Gunners hi ṭum 80 an chak thung - vawi 50 dang chu an inhnehtawk.
A hahthlak
April thla chhung khan Manchester United-in inelna hrang hrangah match kua (9) an khel a, Ningani zan khan Europe League semifinal first leg-ah Celta Vigo chu Marcus Rashford-a goal hmangin an luhchhuah bawk. Spain a inkhel chau tan London a zin zui leh nghal hi hna hahthlak a tling ang tih chu thil chiang a ni.
Kum 54-a upa Mourinho chuan, "Chawlhkar li leh a chanve chhungin match 10 kan khelhna a ni a, player
ṭhenkhat hi chuan khelmual chhungah hun an hmang rei zawn tawh lutuk. Arsenal kan hmachhawn hunah chuan minute khel hnem ṭhang deuh ho chu an inlan lo ang," tiin a sawi.
United hian Nilaini zanah second leg khel turin Celta Vigo an mikhual zui dawn a, May 14, Pathianni zanah Premier League nomawi beiseitu Tottenham Hotspur chu White Hart Lane-ah an lenchilh leh nghal dawn a ni.
Tun hnaiah player inhliam nasa vangin Mourinho tan tlarhnungah duhthlan tur a vang ṭhin hle. Luke Shaw tan season a tawp tawh a, Chris Smalling leh Phil Jones te an khel thei lo mek bawk - Eric Bailly erawhin Celta Vigo a hmachhawn thei leh tawh thung.
Chak a tawk lo...
Arsenal-in an match hnuhnung berah Tottenham 2-0 a an ngam loh avangin kum 1995 hnua a vawi khat nan an hmelma Spurs hnuaiah season an khar dawn tih a chiang tawh. Season thara Champions League khelh an beiseina chu an kutah ni loin club dang kutah a innghat zui bawk.
League table-a parukna Gunners manager Wenger chuan, "North London derby hma kha chuan, kan match zawng zawngah chak ni ila chuan a sang pali zingah kan tel ngei a rinawm. Mahse, kan chak tak loh avang khan inkhelh hmabaka chak vek ringawt a tawk tawh lo a, midang result-ah kan innghah a ngai tawh. Kan tih theih awmchhun chu chak vek a ni tawh mai," a ti.
Arsenal hian league match 33 an khelh aṭanga point 60 hmuin table-ah parukna an ni a, palina Manchester City an phak lohna chu point ruk a ni. United bakah Southampton, Stoke City, Sunderland leh Everton an la hmachhawn dawn, hengah hian hnehna chang vek pawh ni se City leh Man United chetsual an chan a ngai tawh a ni.
Manchester fixture chungchang zawhna chhang zuiin Wenger chuan, "Match khelh tur kan ngah a nih chuan inelnaah kan dam rei tihna a ni. Team tinah hian player ṭha 11 chauh an awm lo a, bench-ah pawh player man to leh ṭha tak tak an ṭhuttir fur a ni. Engtiangin nge an inrem dawn ka ngaihtuah lo, a pawimawh chu kan khelh dan tur zawk a ni," a ti.
Gunners player inhliam Shkodran Mustafi, Granit Xhaka leh David Ospina te chuan team training an zawm pangngai leh thei vek tawh a, French manger Wenger-a'n tun hnaia a hman ṭhin tlarhnung a defender pathum a chhunzawm thei a, Germany international Mustafi a dam tawh avangin 4-4-2 formation pawh a duh chuan a hmang leh thei tawh tihna a ni.