Huaisen kan mamawh - Klopp

Liverpool manager Jurgen Klopp chuan season thara Cham­pions League khel tur chuan a player ten huaisenna an mamawh thu a sawi. Premier League match thum bak khelh tur nei tawh lo Reds hian Pathianni zan dar 6:00-ah Southampton an mikhual dawn a ni.

Klopp chuan, "Table chung lama season khar kan duh chuan match zawng zawngah theihtawp kan chhuah a ngai. Southampton hi he league-a team ṭha ber pawl an nih avangin a awlsam dawn lo. Mi ṭhenkhat tan chuan a zam awm viau ang a, keini erawh huaisen tak leh nuam ti taka kan khelh a ṭul dawn a ni," a ti.

German coach chuan Saints hneh turin ruahmanna danglam tak an neih hran loh thu sawiin, "Kan tum ber chu Anfield chhawr ṭangkai a ni mai. Huaisen taka kan awm a ṭul a, kan chakna ber mipuite kan hman ṭangkai a ṭul bawk ang," a ti a, Southampton laka thawm awmze nei chhuah turin fan-te a duh.

Reds-in Watford laka hnehna an chan ṭumin Philippe Coutinho chu hliam vangin lakchhuah ngai mah se Klopp chuan a player pawimawh hian training a zawm leh tawh thu a sawi a, season tira inhliam Danny Ings-a'n ṭhat lam a pan zel thu sawiin February hnua la inlan leh lo Jordan Henderson dinhmun erawh a sawi thei lo thung.

Watford laka goal ropui khungtu Emre Can chungchang sawi nghalin Jurgen Klopp chuan, "Bicycle kick hmanga goal a khung hnuah kha chuan mi zawng zawngin cham turin an duh tawh! Emre ka ngainat thu hi sawilan kher a ṭul lo a, a goal vang khan pressure a nei lo ang," tiin goal ropui khungtu Can-a buai loh thu a sawi.