BCA aiin TBL an huai zawk

Khatla TBL chuan Mizoram Super League season thumna final khel turin an dinhmun an siam ṭha. Ningani zan khan Zarkawt BCA leh TBL ten tualchhung player hlangin semifinal game 1 an khel a, team huaisen zawk TBL 67-65 in an chak.

MSL vawi hnih buatsaih tawha nomawi chawi ve ve thei TBL hian tun season-ah beisei an phak lo, league round-ah palina an nih avangin hmahruaitu BCA an hmachhawn a ngai. Thawhlehni zanah semifinal game 2 khelh leh a ni ang.

TBL an huai

Hawla Indoor Stadium-a inkhelah tun season-a hneh loh la tawng lo Zarkawt team lamin bul an ṭan ṭha zawk. PC Lalmuansanga, Lalremsanga, David Lalruatfela, Henry Lal­rammngaihawma leh Dennis Lalmuanpuia te hmanga bul

ṭanin quarter hmasa berah 19-15 in hma an hruai nghal.

BCA hian quarter lina tawp lam thlengin 56-55 in hma an hruai chhunzawm thei. TBL hian point khata an hniam zawk lai hian lehthal theihna hun ṭha an nei. Mahse, season hmasa Most Valuable Player Vanlalmuana leh Nelson Lal­rolhua ten free throw an hmuh an chhawr ṭangkai thei lo, BCA an vannei rih.

Hun tlemte chauh a awm tawh tiah TBL lamin champion zia an chhuah a, Gospel Lalthawmmawia basket hmanga hma hruaiin an dinhmun an sawhnghet. BCA lamin Henry Lalrammngaihawma hmangin nihrual theihna hun an neih an hmang ṭangkai thei lo, game 1 bika free throw vawi ruk lut Henry hian a tawpah a hlah a, tawnhriat ngah TBL an chak.

Pen khat

Khatla TBL manager H. Laldinsanga chuan, "Final lut turin kan dinhmun kan siamṭha chho a, pen khatin final kan rap tawh. A tira hnufual zawk nih hi chu kan tihdan ṭhin a ni a, kan buai phah lo," tiin Vanglaini a hrilh.

TBL tan hian Gospel-a chu player langsar ber niin point 13 a score bakah rebound vawi nga a la bawk. Ani bakah hian Mapuia leh Nelson Lalrohlua ten point riat an nei a, point ruk nei thei pathum - Simon H. Lalremruata, Vanlalmuana leh Eddie Zaithanmawia te an ṭangrual ṭha bawk.

A la tawp lo

MSL1 final-a an hneh loh TBL lakah BCA hian league round lamah phuba an la tawh a, semifinal-ah erawh Henry-a point 18 leh Matthew Remtluanga Sailo point 15 an chakpui zo lo. Zarkawr Serpents nen an inkhelh ṭuma hliam guard Zonunsanga khelh theih loh an tuar tih hai rual a ni lo.

BCA coach Lalruatfela chuan, "Kan duhthusama ṭhain kan khel thei lo, kan player pawimawh Zonuna awm lo kha a lang a, chutihrualin kan vanneih ni chu ni se chak thei kan ni. Fans lamin min ṭawiawm ṭha a, game 2 kan khelh leh turah hian mipui nen hnehna kan chan ngei ka beisei," tiin Vanglaini a hrilh.