Dalglish hmingin Anfield-ah stand

Liverpool chuan club legend Kenny Dalglish hming chawiin Anfield-a an stand zinga pakhat Centenary Stand chu an thlak dawn. Kum 66-a upa Dalglish hian player a nih laiin Reds tan match 515 a inlanah goal 172 ngawt a khung sak.

Scotland tan vawi 102 inlana goal 30 khung thei Dalglish hian hian 1985-ah player manager dinhmun a chelh ṭan a, 1989-90 season thleng player-manager dinhmun hi a chelh a ni. Kum 2011-2012 ah khan a vawi hnih nan Reds hi a enkawl leh bawk.

Dalglish hian Reds-a a hun hmasa lamah league nomawi pariat, European Cup pathum, FA Cup pahnih leh League Cup nomawi vawi nga a chawi a, kum 2011-a Reds manager tura a lo kir leh khan League Cup vawi khat chawpui lehin tun dinhmunah non-executive director dinhmun a chelh mek.

Liverpool neitu John W Henry chuan, "Dalglish hming hi he club nen hian a inzawm tlat a, he khawpui leh khelmualte nen pawh hian lak hran theih a ni lo. Tunah chuan chu hming ngei chu chhut kaiin a awm dawn ta," a ti.

Kum 1989 Hillsborough chhiatna avanga Liverpool fans 96 ngawt an thih ṭum khan Dalglish hi Reds manager a ni a, hetih hunlai hian fan-te sunna hunah club chhungkua an tel vek theih nan theihtawpa hma lain a tam zawk chu amah ngeiin a hmanpui bawk.

Henry chuan, "Kenny-a'n Liverpool tana a hnathawh hi goal khung, point hlawhchhuah leh nomawi chawi piah lam a ni," tiin an player ropui ṭhin an chawimawi chhan a sawi.