United-in Europa League final hnaih

Manchester United-in Marcus Rashford goal hmangin Spain-ah hnehna an chang a, Ningani zan khan Celta Vigo 1-0 in an hneh.

Jose Mourinho hote hian May 11, Ningani zan khian Old Trafford-ah Celta hi an mikhual ang. Semifinal pakhat zawkah Ajax-in an muala first leg khelhah Lyon 4-1 in an sawp tawh bawk. Europa League final hi Friends Arena, Stockholm-ah May 24 zan khian khelh tur a ni.

Danglamna Rashford

Balaidos-ah United-in tlarhmaah Marcus Rashford, Jesse Lingard leh Henrikh Mkhita­ryan te dahin inkhel thununtu zawk a ni a, goal khung erawh an harsat thung.

Mourinho hote hian Paul Pogba leh Marouane Fellaini te hmangin midfield an thunun a, kartawpa Swansea City nena inhliam Eric Bailly-a'n inkhel bul ṭan bawkin tlarhnung a phui ṭha bawk.

Celta keeper Sergio Alvarez khelh ṭhat zanah Rashford-a'n danglamna thlen thei a ni tih pholangin minute 67-naah freekick aṭangin a khung. English rawlthar kum 19-a upa Rashford hian quarterfinal-a Anderlecht an hneh ṭumin extra time-ah chakna goal a khung tawh bawk.

Manchester United hian Europa League hi an la cham­pion ngai lo a, tun ṭuma nomawi an chawi a nih chuan Juventus, Ajax, Bayern Munich leh Chelsea te huangah an lut thei ang. Heng club pali hian Champions League (European Cup), Europa League (UEFA Cup) leh European Cup Winners' Cup an champion vek tawh a ni.

Mualneitu lam pawhin goal khung theihna hun ṭha neiin Daniel Wass leh Liverpool player hlui Iago Aspas-a ten tauh goal theihna turah an khung lo a, Danish winger Pione Sisto ball pet dan per chu Europa League-a inlan ṭhin Sergio Romero-a'n a dang bawk.

Rahsford a thawkrim

Manchester United manager Jose Mourinho chuan, "Marcus Rashford hi kum 19 chauha upa a ni a, inkhelh nuam titu a ni. Tun hun atan hian training zawhah darkar chanve te awm tlaiin freekick pet a zir ṭhin a ni," tiin a pian pui a nih bik loh thu a sawi.

Portuguese manager Mou­rinho chuan sawi chhunzawmin, "Old Trafford hian kan chak a duh ngei ka ring a, Old Trafford-in chak a duh chuan kan chak ṭhin," tiin second leg atan mipui a kar thiam hle.

Thlirna Tawi
Leg 1 - Results
Ajax 4 - 1 Lyon
AJA : Valbuena 66'
LYO : Traoré 25', 71'; Dolberg 34'; Younes 49
Celta Vigo 0 - 1 Manchester United
MAN : Marcus Rashford 67'
Leg 2 - Fixtures
May 11, Ningani Zan
12:35 AM Lyon Vs Ajax
12:35 AM Man United Vs Celta Vigo